Børsdagen: Lønsam investering i «propellfabrikk»

Saka er oppdatert med børstabell for Nordvestlandet

Aksjen til Kongsberg Gruppen hadde ein god dag på børsen fredag, etter å ha lagt fram eit nytt godt resultat frå fjerde kvartal i fjor.

Kvartalsrapporten viste at inntektene for Kongsberg Maritime framleis peiker oppover, som den gjorde for resten av konsernet. Veksten i ordreinngangen har dabba av, men den maritime utstyrsleverandøren har framleis ei ordrebok på 19,1 milliardar.

Investorane svara med å sende Kongsberg-aksjen opp over 11 prosent.

På ein slik dag kan den tidlegare Kongsberg Maritime-sjefen Egil Haugsdal more seg med å dra fram Dagens Næringsliv sin børskommentar frå hausten 2018.

Han reagerte etter at avisa skreiv at, «2,5 milliarder kroner fra staten for å kjøpe en propellfabrikk i Ulsteinvik har vært penger ut av vinduet». På det tidspunktet var kursen for Kongsberg-aksjen på veg ned mot 100 kroner aksjen.

Fredagens sluttkurs på 600 kroner, er om lag seks gonger høgare enn den gong. I desse åra har inntektene til Kongsberg Maritime nådd stadig nye høgder, og var i fjor det klart største forretningsområdet i konsernet.

Fredag la også Hofseth Biocare fram rapporten for fjerde kvartal i 2023 - og blei straffa av investorane. Ved stengetid var aksjekursen ned meir enn fire prosent.

Kvartalsrapporten viste høgare inntekter og minka overskot. Samtidig opplyser leiinga at målet er 50 prosent vekst i omsetninga – og pluss – i løpet av 2024.

Hovudindeksen på Oslo børs slutta i pluss fredag etter fleire dagar i raudt. Fasiten ved stengetid var likevel kring 1,14 prosent ned for børsen i løpet av veka.