Børsdagen: Storaksjonær sel seg ned

Det er japanske Mitsui som har seld 12.604.225 aksjar i Hexagon Composites, ifølgje ei børsmelding.

Det tilsvarar ein eigarandel på seks prosent. Etter salet eig Mitsui 15,8 prosent i Hexagon Composites og er fremleis største einskildaksjonær.

Salet er gjort til 25 kroner aksjen, som gir Mitsui 315 millionar kroner i kassa.

Skapte kursfall
I går var aksjekursen til Hexagon Composites 28,20 kroner då børsen stengte for dagen. Mitsui-salet senka kursen, som klokka 14:13 er 24,85 kroner aksjen, ned 11,88 prosent sidan i går

Salet av aksjar er ein del av Mitsui sin langsiktige strategi for å betre balansere deira eksponering mellom Hexagon Composites ASA og Hexagon Purus ASA, heiter det i børsmeldinga. (Mitsui eig 15,6 prosent i Hexagon Purus). 

Mitsui har ingen umiddelbare planar om å selje fleire aksjar i nær framtid og har forplikta seg til ei 180-dagers bindingsperiode for resten av aksjane selskapet eig Hexagon Composites.

Avslo å selje
Det var meklarhusa Carnegie and Dnb Markets som hadde jobben med å organiserer salet.

Styreleiar og storaksjonær Knut Flakk hadde og høve til å selje aksjar samstundes med Mitsui, men takka nei. Han har og forplikta seg til å ikkje selje aksjar han eig direkte eller indirekte før utløpet av mars i år.  Flakk kontrollerer i alt 22.568.314 aksjar i Hexagon Composites.

Maria Lilly og Erika June Flakk - døtrene til Knut Flakk har imidlertid tidlegare seld seg ned i Hexagon Composites. Selskapet Nødingen, der dei eig 45 prosent kvar og faren resten, hadde for eitt år sidan 4,7 millionar aksjar, og har no 0,7 millionar aksjar i Hexagon Composites. ifølgje Finansavisen.

Artikkelen er oppdatert, mellom anna med aksjekursar for børsnoterte selskap på Nordvestlandet, etter at børsen stengte for dagen.

Dagens børsvinnar på Nordvestlandet blei Arctic Bioscience, som kom med kvartalstal per 4.kvartal i dag.