Japanske investorar på langsiktig reise

Statsministeren, bygdefolk og samarbeidspartnarar – men også ein rekke investorar – deltok denne veka på opninga av Norwegian Hydrogen sin nye fabrikk på Hellesylt.

Blant dei var Manabu Miyamoto som sitt i den europeiske leiinga til det japanske Mitsui-konsernet.

Dei kom inn som investor i Hexagon Composites i 2016, og har sidan utvida sine investeringar til fleire selskap der Knut Flakk har vore sentral.

Storeigar i fleire selskap
I dag sitt den japanske industrigiganten med betydelege eigarskap i både Norwegian Hydrogen, Hexagon Purus og Hexagon Composites.

– For oss dreier det seg aldri om korttidsforhold. Vi ønsker langsiktige samarbeid og er tolmodige med våre investeringar, seier Miyamoto til Nett No på engelsk.

Mitsui hadde vore representert i Norge i fleire tiår, før dei kasta sine auge på dei tre selskapa som har sprunge ut frå Ålesund. Allereie tidleg på 1970-talet oppretta dei sitt første kontor i Oslo.

Trur Norge vil ta føringa
Mitsui-toppen fortel at dei ser på Norge som leiande når det gjeld «nye» energiformer, som hydrogen, men også fleire område.

– Vi har sterk tru på at Norge vil ta føringa på desse områda globalt, og vil jobbe vidare med både Norwegian Hydrogen, Hexagon Purus og Hexagon Composites for å hjelpe dei til å bli større verksemder framover, fortel han.

– Vi ser at det er potensiale på desse felta i Norge, legg Miyamoto til.

– Vil dokke med andre ord vurdere å investere i fleire selskap også her i regionen?

– Ja, kvifor ikkje, seier den smilande japanaren.

«Lette å finne saman med»
Konsernsjef Jon Erik Engeset i Hexagon Composites fortel at han har opplevd dei japanske investorane som «lette å finne saman med», sjølv om det er ulike kulturar.

– Ein må jobbe med å etablere gode relasjonar og tillit, og samtidig er desse store selskapa veldig nøye med å følgje reglar og normer. Det må på plass, for å vise at ein er til å stole på, seier Engeset.

Sjølv hadde han avgrensa erfaring med å gjere business i Japanfør Mitsui kom inn på eigarsida.

Engeset påpeiker at sjølv om norsk og japansk kultur kan verka vidt ulike, så blir verdiar som høflegheit og respekt høgt verdsett i møte med andre menneske.

– Når ein blir betre kjent, går samarbeidet enklare og det har også utvikla seg til personlege vennskap både for eige del og fleire kollegaer, seier Engeset.

Merkar meir usikkerheit
På opninga av Hellesylt-fabrikken var det representantar frå fleire japanske investorar. Både Toyota og Panasonic er mellom partnarane til Hexagon Composites.

På spørsmål om Engeset merkar skilnad i korleis investorar frå utlandet ser på Norge, etter skatteskjerpingar og milliardflukt til Sveits, er han tydeleg.

– Eg har opplevd sjølv både i London og New York korleis fleire miljø snakkar annleis om Norge, og at det har danna seg ei oppfatning om at vi er meir uføreseielege.

At Norge blir sett på som ein bananrepublikk, meiner han er overdrive. Likevel er han ikkje tvil om at innføring av til eksempel grunnrenteskatt på oppdrett, har betydelege negative konsekvensar.

– Det er ganske openbert at når ein innfører ei så radikal omlegging, som også treffer utanlandske investorar som har gått inn i næringa, så sett det ein støkk i investorane, seier han.

– Definitivt eit konkurransefortrinn
Engeset påpeiker at svak kronekurs heller ikkje er ein fordel sett frå utanlandske investorar sin side. Det gjer det mindre attraktivt å «hente pengar heim» frå Norge.

– Framleis blir Norge likevel sett på som eit land med relativt låg usikkerheit og stor grad av stabilitet, og det er definitivt eit konkurransefortrinn, legg han til.

Respekt for aksjonærar sine rettar er også ein del av bildet, som trygger utlendingar til å plassere pengane sine her til lands, meiner Engeset.

– Mindre interessant å kome til Norge
Hexagon Composites-sjefen meiner det er grunn til å vere meir uroleg for korleis Norge stadig sakkar akterut i undersøkingar om innovasjon og produktivitetsforbetring.

– Ei slik utvikling gjer det mindre interessant å kome til Norge. Vi har mange bra bedrifter, men dei fleste har vore her ei stund – og er i næringar der vi allereie er sterke, seier han.

Engeset påpeiker at det er anna type selskap som trekker til seg utanlandske investorar i våre naboland Sverige, Danmark og Finland.

– Slik sett meiner vi Hexagon Composites skil seg litt ut, synest det er kjekt at eit selskap som vårt har vekt ei slik interesse, legg han til.