Børsdagen: Ulike vektklasser

Laksen Salmon Evolution slakta i tredje kvartal vog i gjennomsnitt 3,3 kilo sløyd og hovudkappa. Hos Atlantic Sapphire var gjennomsnittsvekta 2,19 kilo.

Begge selskapa har sendt ut børsmeldingar med oppdateringar av status per 3. kvartal, Atlantic Sapphire i går og Salmon Evolution i dag. Meldingane fortel om to selskap i same bransje, men med store skilnadar i resultat og historie.

98 prosent av den slakta laksen til Salmon Evolution hadde toppkvalitet (superior). Atlantic Sapphire opplyser ikkje noko om kvaliteten i si børsmelding.

Salmon Evolution fekk i gjennomsnitt 72 kroner kiloen for laksen sin (106,1 kroner i andre kvartal). Atlantic Sapphire opplyser ikkje noko om prisen.

Ved utløpet av tredje kvartal har Salmon Evolution 2582 tonn laks i anlegget sitt (levande vekt.). Atlantic Sapphire gir ikkje tilsvarande informasjon.

Begge selskapa er børsnotert. Salmon Evolution-kursen er opp 2,06 prosent samanlikna med starten av 2024, Atlantic Sapphire-kursen er ned 91,4 prosent i same periode.

Salmon Evolution driv landbasert lakseoppdrett i Indre Harøy på Romsdalskysten, Atlantic Sapphire ved Miami i USA.

For lite fôr
For lite mat er i alle fall ein del av forklaringa på at Atlantic Sapphire-laksen, som blei slakta i tredje kvartal, vog mindre enn Salmon Evolution-laksen.

I oppdateringa per andre kvartal melde Atlantic Saphhire at anlegget sin fôringskapasitet var for liten. I oppdateringa for tredje kvartal skriv selskapet at gjennomsnittsvekta på den slakta laksen har auka frå 1,42 kilo i juli til 2,19 kilo no. Selskapet har tilpassa mengda laks i anlegget til fôringskapasiteten og ventar at gjennomsnittsvekta på slakta fisk vil vere høgare i fjerde kvartal.

2500 tonn
Salmon Evolution held fast ved tidlegare anslag om at det selskapet vil slakte tilsaman 2500 tonn i andre halvår i år.

Selskapet er i gang med bygging av det andre av tre byggesteg.

Ved å sette inn fleire tankar der fisken som kjem frå smoltanlegget får vekse seg større før den blir flytta inn i hovudtankane, vil andre byggesteg auke produksjonskapasiteten frå 7.900 til 18.000 tonn hovudkappa og sløyd laks i året.

Artikkelen er oppdatert, mellom anna med aksjekursar for børsnoterte selskap på Nordvestlandet, etter at Oslo Børs stengte i ettermiddag.