Børsdagens: Storkjøp i Golden Energy

Investeringsfondet Fleetscape Luxembourg 2 sel 195 millionar aksjar i offshorereiarlaget Golden Offshore Energy Services i Ålesund for 39,5 millionar dollar - 434 millionar kroner - melder selskapet i ei børsmelding.

Det tilsvarar ein eigarandel på 39,03 prosent i selskapet. Salet skjedde utanom børs.

Fleetscape er forvalta av kapitalforvaltningselskapet Oaktree, som styremedlemane Fredrik Ulstein-Rygnestad og Guillaume Bayol i Golden Energy Offshore Services er knytt til.

Kjøparen er Blue Ocean GEOS MI LLC, skriv Golden Energy Offshore Services i ei ny børsmelding, etter at børsen opna i dag. Investeringsfondet som no er den nye storaksjonæren er forvalta av eit amerikansk investeringsselskap, Blue Ocean Partners.

Over dobla pengane
Fleetscape kom inn på eigarsida i fjor haust, og har meir enn dobla verdien av investeringa si fram til salet no, ifølgje administrerande direktør Per Ivar Fagervoll i reiarlaget.

Ved børsslutt måndag var aksjekursen i Golden Energy Offshore Service 1,69 kroner aksjen. Ved 10-tida var den oppe i 1,89 kroner aksjen, eit nivå den ikkje har hatt sidan våren 2022. Dagens sluttkurs blei 1,83 kroner aksjen, opp 7,99 prosent samanlikna med i går.

Handelen mellom Fleetscape og Blue Ocean prisa aksjen til knappe 2,20 kroner aksjen.

- Veldig positivt
Fagervoll er godt nøgd med aksjetransaksjonen og viser mellom anna til at handelen skjedde til ei kurs langt over kva aksjen har vore handla til på børsen.

- Veldig positivt. Det viser at det er interesse for aksjen og selskapet , seier han.

Også Blue Ocean investerer for å tene pengar og investeringa si, peikar Fagervoll på. og seier selskapet er ope for "fleire ting", framover.

Skal betale utbytte
Golden Energy Offshore Services har i fleire rapportar og meldingar på rad vore svært optimistisk til utviklinga i marknaden for forsyningsskip til offshoremarknaden.

Selskapet var også optimistisk i kvartalsrapporten for fjerde kvartal 2023, og fortalde aksjonærane at dei truleg har utbytte i vente:

«Som et resultat av et økende backlog, stigende rater og en sterk balanse, er selskapet godt posisjonert for å begynne å returnere kapital til aksjonærene som utbytte i løpet av 2024», skriv selskapet i ei pressemelding.