Giørtz doblar utbyte etter nytt rekordår

H I Giørtz Sønner hadde eit nytt toppår i fjor med rekord-omsetning – og overskot i engrosverksemda.

Årsaka til at Sula-bedrifta legg bak seg nok eit rekordår – etter det førre i 2020 – er organisk vekst, saman med effektane frå koronapandemien.

Omsetninga enda på drygt 3,8 milliardar og resultat før skatt bikka for første gong 100 millionar i 2021 (sjå tabell under).

160 millionar i utbyte på ti år
H I Giørtz Sønner driv med engroshandel til daglegvare og serveringsmarknaden. Dei ti siste åra har verksemda vore ein pengemaskin med utbyte på til saman 160 millionar kroner.

Det gode fjorårsresultatet gjer at eigarane doblar utbyte samanlikna med dei siste åra, og tek ut 40 millionar kroner.

I 2012 og 2013 vart det teke utbytte på ti millionar årleg. I åra etterpå, frå 2014 til 2020, var det årlege utbytte på 20 millionar, før fjorårets dobling.

Eigekapitalandelen utgjorde ved årsskiftet 53 prosent og likviditeten blir sett på som god, ifølgje årsrapporten.

(saka held fram under)

Ser effektar av automatisering
Konsernet samarbeider med Solwr – tidlegare Currence Robotics – i to forsking og utviklingsprosjekt.

Teknologiselskapet har mellom anna laga ein robot som sorterer paller, og som H I Giørtz har teke i bruk. Ifølgje årsrapporten ser ein effektane i produksjonen etter at roboten er sett i full drift.

Innføringa av ein plukkrobot frå same selskap blei forseinka i fjor, men målet er å ta denne i bruk i løpet av året.

Rekordomsetning i daglegvare
Daglegvarebransjen har hatt gode tider under pandemien. Det viser att i verksemda til Sula-konsernet.

Mellom anna sette den Giørtz-eigde Eurospar-butikken på Amfi Moa ny omsetningsrekord i løpet av fjoråret. Selskapet som heiter Moa Mat, er den største lokaleigde daglegvaren i regionen.

Konsernet er også medeigarar i ein rekke daglegvarebutikkar på Sunnmøre og i Nordfjord. Eigarskapen er flytta over til H I Giørtz Holding, saman med fleire eigedomsselskap i Ålesund-området. Ørsta, Herøy og Hornindal.