Ein firedel av ordreboka er vekke

Ekornes-konsernet auka inntektene i tredje kvartal med ni prosent, men ordreboka krympar kraftig.

Det viser kvartalsrapporten som blei offentleg torsdag.

Møbelkonsernet har allereie starta å bemanne ned, etter oppturen i samband med pandemien. Samtidig har kostnadene auka.

I torsdagens børsmelding kjem det fram at ordreboka har krympa med 25 prosent samanlikna med same periode i fjor.

Omsetninga i kvartalet enda på 1.113 millionar kroner. Driftsresultatet blei 61,3 millionar – om lag ei halvering samanlikna med same kvartal i fjor (sjå tabell under).

Ved utgangen av kvartalet var omsetninga i år på meir enn 3,8 milliardar kroner. Det er ein auke på meir enn 700 millionar samanlikna med same tidspunkt i fjor.

Ekornes er ikkje åleine om å merke at møbelmarknaden har dabba av. Det er bedriftene som produserer for privatkundane som har merka omslaget.

I dag blir Norsk Industri sitt bransjetreff for møbelindustrien arrangert i Sykkylven. Arrangementet er det tredje i rekka og har samla omlag 100 deltakarar.

Trass i omslaget i marknaden er møbelindustrien framleis ein industri med optimisme og med meir solide bedrifter enn før koronapandemien, sa bransjesjef Egil Sundet i Designindustriens bransjeforening til NETT NO i førre veke.