Ekornes ser lysning

Inntektene gjekk ned, men lønsemda auka for Ekornes-konsernet i 2024 viser kvartalsrapporten per 4. kvartal 2024, som er offentleggjort i dag.

2024 enda i minus, men både i tredje og fjerde kvartal i fjor hadde Ekornes QM Holding overskot før skatt. (Sjå tabell)

"Aktiviteten tok seg opp i fjerde kvartal i tråd med sesongmønsteret, med auke både i ordreinngang og ordrereserve øker. Positiv salsutvikling har halde fram inn i 2025, noko som indikerer ein gradvis oppgang i marknaden", skriv selskapet i kvartalsrapporten.

Det er den nordiske og nord-amerikanske marknaden som utviklar seg best, medan resten av Europa heng etter på grunn av laber utvikling i økonomien, ifølgje kvartalsrapporten.

Auka ordreinngang
I fjerde kvartal i fjor auka Ekorneskonsernet ordreinngangen med 19 prosent samanlikna med fjerde kvartal 2023, til 1154 millionar kroner. Det gjorde at ordrereserven ved utgangen av 2024 var 585 millionar kroner, opp frå 480 millionar kroner ved utløpet av tredje kvartal 2024 og frå 468 millionar ved utløpet av 2023. 

Stressless er det viktigaste varemerket for Ekornes og sto for 74 prosent av driftsinntektene til konsernet i fjor. IMG-møblane stor for 19 prosent og Svanemadreassene for resten. 

Samanlikna med 2023 var inntektene fra madrassene nesten uendra i 2024, medan dei fall høvesvis 9,9 prosent for Stressless-møblane og 10,2 prosent. for IMG-møblane. 

Alle i arbeid
Tidlegare i år sa Ekornes-sjef Tine Hammernes Leopold at konsernet hadde alle tilsette i arbeide.

Det var bodskapen også frå resten av møbelprodusentane i Noreg. Bransjen er forsiktig optimistisk. 

Under koronapandemien var det ein boom for møbelindustrien fordi folk brukte pengar på møblar og oppussing i staden for på reiser og restaurantar. Då pandemien var over blei det omvendt, og mellom andre Ekornes sa opp folk og permitterte.