Endeleg opptur for flytrafikken

Passasjertala for flytrafikken i september viser at talet på reisande peika kraftig oppover, samanlikna med same periode i fjor.

Alle flyplassane i Møre og Romsdal og Nordfjord har auke, viser statistikken frå Avinor.

Største auke var det ved Sandane, der 79 prosent fleire reiste over flyplassen i september, samanlikna med i fjor. Til saman dreia det seg om 3612 personar.

Framleis godt under 2019-nivået
Ålesund Lufthamn Vigra som er den største flyplassen i regionen, hadde ein oppgang på 68 prosent reisande i alt. Til saman 65.125 reiste over flyplassen førre månad.

Sjølv om flytrafikken har auka betydeleg dei siste månadene, er trafikken i september framleis 39 prosent under nivået frå september 2019, påpeiker flyplass-sjef Tor Hånde på Vigra i ein e-post.

Trafikktala for Molde auka med 62 prosent i september, Ørsta/Volda med 49 prosent og Kristiansund med 4,5 prosent, viser Avinor-statistikken.

Charterflygingane starta opp
Tor Hånde på Vigra opplyser at den viktigaste årsaka til auken, er at smitteverntiltaka i samband med pandemien er blitt lempa på.

Samtidig er flytilbodet blitt trappa opp, samanlikna med tidlegare i år.

Utlandstrafikken auka med heile 128 prosent, samanlikna med september i fjor. Det går no rutefly frå Ålesund-flyplassen til Amsterdam, Gdansk, Kaunas og Alicante. Frå helga starta også charterflygingane til Gran Canaria opp.