Equinor vil produsere mindre olje, på sikt

NPK-NTB: På sikt ventar Equinor å produsere mindre olje og gass, seier selskapet i samband med lansering av ny miljøstrategi i dag.

Lågare karbonintensitet og auka investeringar i fornybar energi er ein del av strategien for ein meir grøn profil, seier selskapet i ei pressemelding.

– Vi vil framover kutte utsleppa ytterlegare, og på lengre sikt ventar Equinor å produsere mindre olje og gass enn i dag som følgje av redusert etterspurnad. Ein betydeleg vekst innan fornybar energi og lågkarbonløysingar vil gi raskare endring fram mot 2030 og 2035, seier konsernsjef Anders Opedal.

Selskapet ønskjer å redusere netto karbonintensitet med 40 prosent innan 2035. Auka investeringar i fornybar energi og lågkarbonløysingar vil utgjere over 50 prosent av dei årlege bruttoinvesteringane deira innan 2030.

Nær 200 milliardar kroner skal investerast i fornybar energi i åra framover, ifølgje selskapet.

Konsernsjefen seier at strategien til selskapet er å akselerere omstillinga samtidig som dei styrkjer kontantstraumen og avkastinga.

– Vi forbetrar olje- og gassporteføljen vår for å levere endå sterkare kontantstraum og avkasting med lågare utslepp frå produksjonen, og vi forventar betydeleg og lønnsam vekst innan fornybar energi og lågkarbonløysingar. Dette er ein strategi for å skape verdi som ein leiar i det grøne skiftet, seier Opedal.