Fekk gehør for meir utdanning i distrikta

Alfred Bjørlo (V) møtte ein lydhør minister då han nyleg tok opp spørsmålet om meir utdanning i distrikta i eit spørsmål i Stortinget.

Stortingsrepresentanten frå Nordfjordeid ville vite korleis regjeringa jobba med å sikre meir utdannning i distrikta. Han meiner Studiehub Nordfjord er eit godt døme.

– Kort fortalt handlar modellen om at Studiehub Nordfjord skal vere tilbydaren som legg til rette for organisering av og strukturar for den desentraliserte utdanninga i regionen Nordfjord, fortalde Bjørlo.

Utdanning påverkar flyttemønster mest
Venstre-politikaren meiner det hastar å få på plass konkrete modellar for meir høgare utdanning i Distrikts-Noreg.

– Det gjeld berre å få den berømte fingeren ut og kome i gang, sa Bjørlo.

Han viste til at utdanning er den faktoren som påverkar flyttemønsteret mest i retning av sentralisering.

– Samtidig veit vi at trongen for meir utdanning og kompetansepåfyll gjennom heile livet berre vil bli større i åra framover, ikkje minst knytt til det nye, grøne distriktsnæringslivet som no skal vekse fram, påpeika Bjørlo.

Vil bygge nettverk av studiesentre
Forskings- og utdanningsminister Ola Borten Moe (Sp) kunne svare at han kjente godt til Studiehub Nordfjord og han trur slike initiativ kan vere gode verktøy for å nå ut i lokalmiljøa.

Regjeringa vil bygge ut eit nettverk av studiesentra rundt om i landet på plassar der det ikkje er studiestader for fagskule, høgskule eller universitet.

– Eg tek sikte på å etablere ei søknadsbasert ordning for studiesentra som kjem i gong i løpet av våren, svara Borten Moe.

Sp-statsråden viste til at regjeringa også auka potten til fleksibel og desentralisert utdanning i årets budsjett.