Fem vil ha støtte til havvind

(NPK-NTB-Amalie Vadla): Sjølv om det er dyrt og mykje framleis er uvisst, har fem selskap søkt om til saman ni milliardar kroner i støtte frå Enova til flytande havvind-prosjekt.

– Det viser stor interesse i næringslivet for å investera i flytande havvind, sjølv om bransjen har opplevd auka kostnader og uvisse dei siste åra, seier leiar for havvind i Enova, Oskar Gärdeman, i ei pressemelding.

Enova er eit statsføretak som er eigd av Klima- og miljødepartementet. Selskapet har som formål å bidra til arbeidet til styresmaktene med den grøne omstillinga av industrien.

I løpet av våren blir det kjent kven som får støtte til havvind-prosjekt. Enova varslar også at det kan bli ein ekstra søknadsrunde seinare i år eller neste år.

Testar ny teknologi
Søkjarane skal setja opp demonstrasjonsanlegg med éin til fem flytande havvindturbinar. Kvart prosjekt kan få maksimalt to milliardar kroner.

Det er dyrt å byggja havvindturbinar. Det heng saman med at materialkostnadene auka i kjølvatnet av koronapandemien.

Ifølgje Enova-leiaren skal prosjekta som får støtta, prøve ut ny teknologi for å få på plass forankra løysingar til slike anlegg.

– Dette er blant dei viktigaste områda der kostnadene må gå ned for at flytande havvind skal bli lønnsamt, seier Gärdeman.

Støttar dei som viser veg

Søknadene skal vurderast ut frå korleis teknologien kan bidra til omstilling og lågare CO2-utslepp.

Blant kriteria søkjarane skal vurderast etter, er mengda produsert energi per støttekrone og spreiingspotensialet for teknologien, ifølgje Enova.

Det skal også vurderast kor innovative prosjekta er, klimafotavtrykket og påverknaden på naturmangfaldet.

– Dei fem selskapa som no har søkt Enova-midlar, skal visa veg for å redusera kostnader og risiko ved å byggja ut anlegg for flytande havvind i stor skala, slik som til dømes i Utsira Nord, og dermed endra heile marknaden i retning av meir fornybar kraft frå havvind, seier Gärdeman.

– Hjelper leverandørindustrien

Politisk har det vore mykje usemje rundt havvindsatsinga, men energiminister Terje Aasland (Ap) har trua.

– Det er behov for vidare teknologiutvikling og kostnadsreduksjonar. Enova-programmet bidreg til dette, og eg er difor glad for den interessa industrien viser, seier Aasland i pressemeldinga.

Han trur flytande havvind kan bidra med vesentleg auka kraftproduksjon til Noreg – og dessutan «gi leverandørindustrien nye bein å stå på».

Fleire hundre tilsette ved verft og leverandørbedrifter i offshorebransjen har det siste året mista jobben på grunn av store nedbemanningar.

(©NPK)