Finefish vert Sande-selskap

- Dette er ein konsekvens av at vi satsar offensivt med utgangspunkt i Sandsøya.

Det seier dagleg leiar Ole Sande i Finefish.

Han eig selskapet saman med Gjermund Bringsvor.

Tidlegare var også Odd Sande og Nina Rusten Sande medeigarar i tidlegare Sandefisk på Sandsøya.

- Dei er no kjøpte ut, og det er no same eigarane av Finefish og det som tidlegare var Sandefisk, seier Sande.

Skal vekse
Selskapet har satsa 44 millionar kroner på ny produksjonshall og utstyr på Sandsøya. Her vart det i fjor omsett for 76 millionar kroner. Målet for neste år er å bikke 100 millionar.

- Vi har store vekstplanar, seier Sande.

Finefish omsette på si side for 154,2 millionar kroner i fjor.

Sande seier at det er ei rekke synergiar ved samanslåinga av selskapa.

- Ikkje minst er det synergiar på kostnadssida.

Det nye samanslåtte selskapet vil samla ha rundt 35 tilsette frå starten av.

- Vi skal verte fleire.

Godt mottatt
Sande opplyser at Sandsøy-satsinga er svært godt mottatt.

- Det gjeld både lokalt på Sandsøya, men også i Herøy, der vi har mange kundar.

- Mange har sendt lukkeønskingar, ikkje minst gjeld det aktørar i næringslivet.

Sande og Bringsvor satsar også stort på marknaden for dyrefôr til kjæledyr gjennom selskapet Vitibit.

- Dette selskapet vert eit dotterselskap til Finefish, seier Sande.