Fire nettselskap i nordvest skuldar kundar pengar

(NPK-NTB-NETT NO) Ei rekkje norske nettselskap har i ti år eller meir skyldt straumkundane pengar, viser tal frå Reguleringsmyndigheten for energi.

Det er i alt snakk om 15 nettselskap som i ti år eller meir har hatt meirinntekter, melder NRK , som har innhenta tala. Til saman skylda dei ved utgangen av 2020 kundane sine nærare 1,7 milliardar kroner.

På nordvestlandet gjeld dette selskapa Mørenett, Sykkylven Energi, Stryn Energi og Rauma Energi.

Meirinntekter betyr at nettselskapa har overskride inntektsrammene, som blir fastsette av Noregs vassdrags- og energidirektorat (NVE) sidan nettselskapa har monopol i sitt område. Rammene blir fastsette av kostnader til drift og utvikling av straumnettet og nettap.

Mest frå lokalt nett
Ifølgje tal frå Reguleringsmyndigheten for energi, var det også meirinntekt i 2020.

Her hadde selskapa rett til å ha inntekter på 22,2 milliardar kroner på lokalt distribusjonsnett, men henta inn 22,9 milliardar kroner.

For transmisjonsnettet kunne selskapa ta inn 10,2 milliardar, men tok inn 11,0 milliardar.

For regionalt distribusjonsnett kunne selskapa derimot ta inn 10,9 millliardar, men tok inn 10,8 milliardar.

65 selskap tok inn for mykje frå kundane i 2020, medan 39 tok inn mindre enn tillatt.

Vil stramme inn
I utgangspunktet er det ikkje ulovleg med meirinntekt, men Reguleringsmyndigheten seier dei vil stramme inn.

– Det er uheldig at nokre av nettselskapa har hatt vedvarande meirinntekt over ein så lang periode, seier fungerande seksjonssjef Roar Amundsveen til NRK, og legg til at dei vil følgje opp dette med dei aktuelle selskapa.

Generalsekretær Morten Andreas Meyer i Huseierne reagerer kraftig på tala.

– Viss det var vi som hadde skyldt nettselskapa pengar, så veit vi at dei hadde gått heile vegen til inkasso for å drive inn dei pengane, seier han.

15 selskap
Her er lista over nettselskapa som skuldar pengar til kundane:

• Elvia
• Arva
• Norgesnett
• Glitre Energi nett
• Agder Energi nett
• Mørenett
• Linea
• KE Nett
• Stryn Energi
• Trollfjord Nett
• Stannum
• Sykkylven Energi
• Rauma Energi
• Flesberg Elektrisitetsverk
• Vesterålskraft nett