Fleire ukrainarar kjem i arbeid

Ferske arbeidsløysetal frå Nav viser framleis låge tal for både Vestland og Møre og Romsdal.

Dei viser også at fleire flyktningar frå Ukraina kjem i arbeid, etter ei periode med stigande arbeidsløyse for denne gruppa.

– Avhengige av eit godt samarbeid
I Vestland er no kvar femte av dei fordrivne frå Ukraina mellom 20 og 66 år i arbeid.

– Vi ventar at talet vil halde fram å stige. For å få nytte av den arbeidskrafta og kompetansen dei har med seg, er vi avhengige av eit godt samarbeid med bedrifter og næringsliv, uttaler fungerande fylkesdirektør Knut Steinar Eitungjerde i NAV Vestland ei pressemelding.

I Møre og Romsdal er det no 321 heilt ledige ukrainarar, ein nedgang på 40 personar sidan slutten av juni. Frå mai til juni har nesten 100 fleire i denne gruppa kome i arbeid, ifølgje ei pressemelding fredag.

Færre ledige enn resten av landet
I både Vestland og Møre og Romsdal er 1,9 prosent av arbeidsstyrken registrert som heilt ledige ved utgangen av juli. Det er litt under landssnittet på 2,1 prosent.

I Møre og Romsdal 2.580 personar registrerte som heilt arbeidsledige. Det er ei auke på 224 personar det siste året.

I Vestland var 6.443 personar registrerte som heilt arbeidsledige ved utgangen av juli – ei auke på 654 personar sidan same tid i fjor.

Mange i bygg- og anlegg kjem raskt i arbeid
Mange bedrifter i bygg- og anleggsbransjen opplever svikt i marknaden.

Ved utgangen av juli er det registrert 274 personar som er heilt ledige i denne bransjen i Møre og Romsdal. Det er 49 fleire personar samanlikna med i fjor – ei auke på 22 prosent.

Nav-direktøren i Vestland er ikkje uroa for situasjonen i hans fylke:

– Bygg og anlegg ser ut til å klare seg betre enn frykta, og betre enn i resten av landet. Trass i stor uro i sektoren, er det framleis låg ledigheit og mange ledige stillingar her. Arbeidstakarar som blir ledige i sektoren, finn raskt ny jobb, seier Eitungjerde.