Tre grep kan løyse krisa med færre yrkesaktive

Måndag stod utfordringane med ei aldrande befolkning og færre yrkesaktive på dagsorden under The North West i Ålesund.

Det skjedde i form av eit seminar om sosial berekraft og entreprenørskap, der også utanforskap i arbeidslivet fekk stor merksemd.

Sjølv om Møre og Romsdal står ovanfor spesielt store utfordringar på dette området dei neste åra, hadde statistikksjef Ulf Andersen i Nav med seg godt nytt for fylket.

– Desse utfordrande er mogleg å løyse. Desse menneske som trengst i arbeidslivet, dei finnast. Vi må berre bruke dei, seier Andersen til Nett No.

Peiker på tre grep
Nav-leiaren peiker på tre grep som kan gjerast for å sikre både private og offentlege fleire medarbeidarar. Ein god start kan vere å inkludere dei kring 30.000 personane som av ulike årsaker står utanfor arbeidslivet i Møre og Romsdal.

– Det andre grepet, er å få ned fråfallet som følgje av sjukefråvær. Vi har eit høgt sjukefråvær i Norge. Det gjer at arbeidslivet går glipp av arbeidskraft kvar einaste dag – og for mange endar på uføretrygd, seier Andersen.

Det tredje grepet, er å få folk til å stå lengre i arbeidslivet ved at dei jobbar eit år, eller to lengre enn dei gjer i dag før pensjonslivet startar.

– Om vi klarer å gjere dei tre tinga, så er vi i mål. Det er eg overtydd om, seier statistikksjefen.

50.000 fleire har kome inn i arbeidslivet
600-700.000 personar står framleis utanfor arbeidslivet i Norge - men pilene peiker i rett retning fortel statistikksjefen.

– Talet på folk som står utanfor arbeidslivet har falle sidan 2019, og vi har fått kring 50.0000 menneske inn i jobb dei siste åra, fortel Andersen.

Samtidig veks befolkninga – som gjer at talet på dei som står utanfor arbeidslivet, ikkje går ned like mykje. Det er skapt kring 150.000 nye jobbar her til lands sidan Støre-regjeringa kom til makta, eit tal statsrådar frå regjeringspartia har vore ivrige med å understreke.

– Dei som har vore på sidelinja
Andersen meiner tala stemmer og at ting går i rett retning,

– Men etter mitt skjønn skjer ikkje dette fordi arbeidsgivarar er blitt veldig flinke til å ta inkludering på alvor, men fordi vi har fått ein veldig stram arbeidsmarknad.

– Det er mange ledige stillingar og nesten ingen arbeidsløyse. Då blir krava til arbeidsgivarane lågare. Det opnar moglegheita for dei som har vore på sidelinja, legg han til.

– Ein arbeidskraftreserve vi har bruk for
Fylkesdirektør Stein Veland i Nav Møre og Romsdal likte bodskapen frå statistikksjefen, om at dei demografiske utfordringane til fylket kan løysast.

Samtidig er det skilnad på å vite kva løysinga kan vere, til at ein faktisk klarer å gjennomføre grepa som skal til.

– Det er ein arbeidskraftreserve vi har bruk for. Det er kanskje det viktigaste vi kan fortelje: At vi «har bruk for deg». Det er så mykje betre å få den beskjeden, enn at vi skal «finne noko til deg», sier han.

– Eg trur vi må bli flinkare til å fortelje frå tidleg alder, at «du som har så mykje energi i klasserommet, deg har vi bruk for i den og den bransjen», legg Veland til.