Flyttar ut av kjøpesenter - byggjer ny butikk

Coop Vest vil byggje ein ny Coop Extra-butikk til 40-50 millionar kroner på Ose i Ørsta, cirka 500 meter unna Amfi Ørsta i Ørsta sentrum der Coop Vest er leigetakar i dag.
Strategi og utviklingssjef Arild Meisterplass i Coop Vest seier selskapet meiner butikken i Ørsta burde ha 30-40 prosent høgare omsetning enn den faktisk har. Fleire grep er gjort for å få inntektene opp, men til slutt at Coop Vest konkludert med at det er best å byggje sin eigen butikk.
- Det er krevande å ligge langt inne i eit senter med eit lavpriskonsept, seier Meisterplass.

Stengjer dørene

Det spesielle med flyttinga er at den nye butikken ikkje er klar når Coop flyttar ut 25. mars i år. Tomta der den nye butikken skal byggast er ikkje ferdig regulert heller, slik at ein ny butikk neppe er klar før neste år.
Grunnen til at Coop gjer det på dette viset er at selskapet har gjort ein avtale med butikkkjeda Europris som overtek den langsiktige leigeavtalen med kjøpesenteret og flyttar inn i lokalet Coop Extra leiger i dag.

Større flate

Medan Coop Extra-butikken i kjøpesenteret er på cirka 1500 kvadratmeter vil den nye butikken vere på omlag 2000 kvadratmeter.
Coop Vest, som dekkjer Sogn og Fjordane og Søre Sunnmøre, har ein annan Coop Extra-butikk i Furene i Volda, omlag midt mellom Ørsta og Volda sentrum. Den er på cirka 2500 kvadratmeter og har nesten dobbelt så stor omsetning som butikken i Ørsta har hatt.

Tomrom i Stryn

I løpet av eit par veker opnar Coop Vest ny butikk i Stryn. Der gjorde Coop Vest som selskapet vil gjere i Ørsta, stengde den eksisterande butikken og satsa på at kundane vil vere der også når den nye butikken opnar dørene.
Forseinkingar i anbod- og byggeprosessen gjer at det nesten er gått to år utan butikk når Coop Extra i Stryn opnar seinare denne månaden.