Forlik mellom Ervik og Remøy

Selskapa Ervik Marine as (Ervik-familien i Ålesund), Frode Igland as (Frode Igland i Bergen), Støylebakken as (Jon Reidar Ervik i Ålesund) og Fagerlia Invest (Jørgen Ervik i Ålesund) anka dommen frå tingretten etter at dei ikkje fekk medhald i erstatningskravet mot Stig Remøy.

Ankesaka i lagmannsretten starta 2. november, men blei avbroten då partane blei samde om eit forlik. Det stadfestar Remøy sin advokat, Ole-Reinhart Notø. Partane er samde om å ikkje offentleggjere innhaldet i forliket.

28,7 millionar

Kravet som lagmannsretten skulle ta stilling til var på 28,7 millionar kroner, i tillegg til renter på det opphavlege kravet.
Dei tidlegare krillpartnarane meinte Remøy var personleg ansvarleg for at dei ikkje har fått betaling frå Olympic Holding for minoritetsposten sin i Juvel-reiarlaget Emerald Fisheries, som dei kravde innløyst i 2013.
Grunngjevinga for kravet var fleire disposisjonar og transaksjonar som blei gjort i Olympic Holding-konsernet, før konkursen i Olympic Holding i desember 1016. Remøy-dominerte Olympic Holding var storaksjonær i Emerald Fisheries.

Ikkje betalt

Forliket set punktum for ein strid som har vart i alle fall sidan 2013. Stig Remøys selskap Olympic Holding vart partnar og etterkvart største aksjonær i krillfiskereiarlaget Emerald Fisheries, med like over 90 prosent eigarandel.
Etterkvart surna samarbeidet og i 2013 kravde dei andre aksjonærane å bli løyst ut av Emerald Fisheries. Medan Stig Remøy meinte 3,60 kroner pr. aksje var rett pris, ville motparten ha 233,27 kroner pr. aksje. Søre Sunnmøre tingrett konkludert i 2015 med at 35,85 kroner var rett verdi. Det gav minoritetseigarane 25 millionar kroner og verdsette selskapet til 250 millionar.
I ankesaka året etter, i august 2016, kom lagmannsretten fram til omlag same beløp.