Får ikkje forlenga millionavtale

Frå 1. juli 2022 og ut 2023 betalte Helse Midt-Norge 46,2 millionar kroner til Medi 3 i Ålesund, gjennom kjøp av polikliniske spesialisthelsetjenester innen psykisk helsevern. Det skriv helseforetaket i ein e-post til NETT NO.

Den toårige avtalen går ut i sommar, og blir ikkje forlenga. Helse Midt-Norge hadde ein rett til å forlenge den i eitt og eit halvt år.

Helse Midt-Norge si vurdering er at det sjølv kan gi pasientane tilbodet dei treng, utan å leige kapasitet hos private bedrifter, ifølgje e-posten.

100 millionar
Gjennom prosjektet «Sikre kritisk kompetanse i psykisk helsevern (PH) og tverrfaglig spesialisert rusbehandling (TSB)» skal Helse Midt-Norge sikre at helseforetaket har dei folka og den kompetansen som trengst i eigne rekker.

Satsinga blir finansiert med 100 millionar kroner i perioden 2024-2024. I tillegg har dei lokale helseforetaka sett i gang lokale tiltak og gjort vurderinga som tilseier at dei kan klare jobben utan kjøpe tenester frå private, ifølgje e-posten.

Ingen oppseiingar
I 2022 hadde Medi 3 Ålesund 160 millionar kroner i driftsinntekt og 7,6 millionar kroner i resultat før skatt. I 2021 hadde selskapet 164 millionar kroner i driftsinntekt, som er den høgaste driftsinntekta selskapet har hatt. Då var resultatet før skatt 4,4 millionar kroner.

Adminstrerande direktør Jan-Terje Teige skriv i ein e-post til NETT NO at Medi 3 vil satse vidare på psykisk helse, og at selskapet ikkje reduserer staben sjølv om Helse Midt-Norge ikkje forlengar kontrakten.

«Vi ønsker å bevare det unike fagmiljøet vi har fått etablert, og har ingen planer om oppsigelser. Vi tror at utfordringene innen psykisk helsevern blir betydelige fremover, og vi mener fortsatt den beste løsningen er å forlenge kontrakten, noe helseforetaket fortsatt har anledning til. Andre tilbud på Medi3 blir ikke svekket på noen måte av denne kontrakten. Medi3 har et inntektsgrunnlag fra både andre offentlige kontrakter, forsikringsselskap, bedrifter og privatbetalende kunder. Vi jobber langsiktig, og ønsker å utvikle et relevant tjenestetilbud videre, og det gjelder både for å kunne være i posisjon til offentlige kontrakter, og kunne tilby tjenester til bedrifter og private», skriv Teige.

Kritisk til avgjerda
I ei pressemelding frå Medi 3 er Teige kritisk til avgjerda om å ikkje forlenge avtalen:

«Vi opplever at vi verken har fått en god begrunnelse for oppsigelsen eller faktagrunnlag som tilsier at like mange pasienter vil kunne få behandlingstilbud direkte fra Helse Midt-Norge. Vi er derfor undrende til om Helse Midt-Norge har oversikt over konsekvensene dette vil få for pasienter som allerede er i krevende livssituasjoner», seier Teige i pressemeldinga.

Han meiner og at avslutninga av avtalen ikkje er i samsvar med styringsignal frå Helse og omsorgdepartementet.

«Avtalen vår har løpt i et og et halvt år. Vi har brukt store ressurser på å bygge opp godt fungerende fagmiljøer som skal kunne være angsiktige samarbeidspartnere med det offentlige. Oppsigelsen gir selvsagt utfordringer for Medi 3, men vi mener det viktigste er at beslutningen får store konsekvenser for en viktig pasientgruppe med stort behov for helsehjelp», seier han i pressemeldinga.

Teige-familien
Jan-Terje Teige og andre medlemer i Teigefamilien i Herøy eig over 90 prosent av Medi 3 gjennom investeringsselskapet Kaston ifølgje databasen Proff.no. Haagensen-familiens selskap Jangaard Export eig 7,3 prosent.

Medi 3 eig datterselskapa Shipmed i Ålesund og Medi 3 Oslo i Oslo.