Første investering like om hjørnet

Det tok lengre tid enn planlagt og var vansklegare å få inn kapital enn venta, men no er investeringsfondet Såkorn 1 Midt klart til å investere.

Fondet har 200 millionar kroner på bok, har allereie fått inn til vurdering omlag 190 bedrifter på jakt etter kapital. Den første investeringa er ikkje langt unna og bedrifter på Nordvestlandet ligg godt an i løypa til å bli dei første fondet satsar på.

- Førebels leiar de, ut frå dei vurderingane vi har gjort så langt, sa Jørgen Pettersen i Cofounder, då har presenterte fondet på eit arrangement i regi av Sparebank 1 SMN torsdag 13. juni.

Nyetablerte og vekstbedrifter
Ideen bak Såkorn 1 Midt er å satse på nyetablerte bedrifter og mindre bedrifter i Trøndelag og Møre og Romsdal som er er i, eller bur seg på, ein kraftig vekst.

Fordelinga av investeringa blir omlag 50/50 mellom dei to ulike gruppene.

Investeringa blir mellom ein og 20 millionar kroner per selskap og for dei større investeringane ønskjer fondet styreplass, seier Pettersen.

Fondet vil typisk sitte som medeigar i tre til sju år.

Tyngre å hente pengar
Då fondet vart lansert i fjor haust var målet å få inn 500 millionar kroner. Sparebank 1 SMN skulle stille med 150 millionar kroner, og håpet at andre investorar ville skyte inn resten.

Forvaltningselskapa Converto i Ålesund og Cofounder i Trondheim skulle saman forvalte pengane.

Kapitalmarknaden viste seg å vere tyngre enn venta. Resultatet blei 200 millionar kroner og forvaltninga blir gjort av Cofunder åleine.

Målet er å hente inn ytterlegare 100 millionar kroner til fondet i løpet av ein 12-månadersperiode, ifølgje Pettersen.

Fleire investorar
Sparebank 1 SMN tok iniitiativet til fondet og har gått inn med halvparten av kapitalen. Resten kjem frå bedrifter og privatpersonar i både Trøndelag og Møre og Romsdal, ifølgje Pettersen.

Mellom investorane er Pir-miljøet i Ålesund , KLP, Reitan Kapital, og Trønderenergi. Pir-miljøet har gått inn med fem millionar kroner, ifølgje Anja Solevågseide i Pir Invest.

Cofounder blei etablert i 2010. Selskapet har vore medeigar i Wavefoil i Ålesund, og er medeigar i Exotek i Stordal.

Wavefoil laga ein venge som kunne fellast inn i skipsskroget når den ikkje var i bruk. Utfelt reduserte vengen motstanden skipet møtte i vatne og gav meir stabil gange i utroleg sjø. Selskapet gjekk konkurs i 2023, men eit Oslo-reiarlag kjøpte buet og satsa vidare.

Exotek lagar terrenggåande køyretøy for rørslehemma.