Ga opp å berge 25 arbeidsplassar

Det blir likevel ikkje vidare drift i vaskeriverksemda Breeze Nordvest på Stranda, og drifta er innstilt.

Det opplyser bustyrar Øystein Remme til Nett No.

Selskapet med 25 tilsette og to systerselskap gjekk konkurs i mai. Til saman hadde selskapa kring 150 tilsette då dei gjekk over ende.

I ettertid var det dialog med investorar både her til lands og utlandet om å overta buet, men den førte ikkje fram.

– Det viste seg at ingen ville overta og difor vart drifta innstilt, seier Remme.

Har fått inn 35 millionar til buet
Vaskeria gjorde oppdrag for institusjonar og reiselivsbedrifter, og det vart anslått at dei leverte sengetøy til kring 35.000 senger årleg.

Selskapa hadde ei samla gjeld på 106 millionar kroner. Samtidig var det betydelege verdiar i buet.

Nokre av desse er allereie realisert. Remme fortel at det er selt mellom anna tekstilar for kring 35 millionar kroner.

– Vidare blir det jobba med ulike interessentar som kan ønske å kjøpe maskinar og anna driftstilbehøyr, seier bustyraren.

Ventar på rapport frå burevisor
Ein burevisor skal gå gjennom konkurssakene. Remme håpar rapporten derifrå er klar over sommaren og at bubehandlinga blir avslutta mot hausten.

Breeze-konsernet etablerte seg på Stranda i 2019, etter at dei kjøpte vaskeriselskapet Rent Nordvest.

Den gong ville konkurrenten Nor-Tekstil ta over Stranda-bedrifta og legge ned, men Konkurransetilsynet sa nei og Breeze fekk tilslaget.