Nytt håp for Stranda-bedrift med 25 arbeidsplassar

Det er nytt håp for vidare drift i selskapet Breeze Nordvest og to andre selskap, etter at interessentar til å overta buet har meldt seg.

Det opplyser bustyrar Øystein Remme til Nett No.

Stranda-selskapet som gjekk konkurs førre veke, har 25 tilsette og er del av Breeze-konsernet, med hovudkontor i Bodø.

Også to andre selskap i Sør-Rogaland og Troms - Breeze Sørvest og Breeze Troms - er omfatta av konkursane.

– Vi er i ein prosess for å finne ut om nokon er villige til å gå inn. Det er mellom anna internasjonale investorar som kan vere villige til å overta alle tre selskapa, seier Remme.

Kring 150 tilsette til saman
Til saman er det snakk om vaskeriverksemder som har hatt kring 150 tilsette i arbeid.

– Det er ein konkurs som råkar mange tilsette og dei har betydeleg verksemd. Difor har vi jobba hardt for å finne ei løysing som gjer at det er mogleg å behalda arbeidsplassane, seier Remme.

Vaskeria gjer oppdrag for institusjonar og reiselivsbedrifter, og bustyrar fortel at det er anslått at dei leverer sengetøy til kring 35.000 senger årleg.

Høg gjeld og store underskot
Totalt hadde selskapa ei samla gjeld på 106 millionar kroner, ifølgje rettspapira frå konkursopningane i Møre og Romsdal tingrett.

Det var óg oppført betydelege verdiar anslått til kring 70 millionar.

Breeze Nordvest-selskapet meir enn dobla omsetninga si i åra 2019 til 2022, frå 16 til 39 millionar kroner.

Samtidig viser rekneskapa eit samla underskot før skatt på meir enn 16 millionar i desse fire rekneskapsåra.

Kjøpte lokalt selskap
Stranda-selskapet påpeika i årsmeldinga for 2022 at likviditeten var stram og belåninga høg. Eigenkapitalen var samtidig nær fem millionar i pluss og styret vurderte løpande situasjonen.

Breeze-konsernet etablerte seg på Stranda i 2019, etter at dei kjøpte vaskeriselskapet Rent Nordvest.

Den gong ville konkurrenten Nor-Tekstil ta over Stranda-bedrifta og legge ned, men Konkurransetilsynet sa nei og Breeze fekk tilslaget.