Golden Energy sel båt nummer to

Fredag 23. januar varsla Golden Energy Offshore Services at det hadde avtalt å selje fleirbruksskipet Energy Empress for 30 millionar dollar, cirka 295 millionar kroner.

I dag melde selskapet at det har fått ein avtale for forsyningsskipet Energy Partner. Prisen er 27,25 millionar dollar - 267 millionar kroner.

– Vi gjer no det vi har sagt at vi skal gjere. At vi på kort tid har inngått avtalar om sal av to fartøy, bekreftar verdien i flåten vår. Når sala er gjennomført, styrkjer det kontantposisjonen og gir oss større finansiell fleksibilitet, seier administrerande direktør Per Ivar Fagervoll i Golden Energy Offshore Services i ei børsmelding.

Utgangspunktet for begge sala var at offshorereiarlaget var i pengeknipe i fjor, og gjekk til aksjemarknaden for å fylle på kassa.

Selskapet fekk henta inn 320 millionar kroner i ei kapitalutviding i desember 2025, mellom anna for å betale gjeld og rekningar. Då varsla selskapet også at planen var å selje minst to skip for å få inn meir pengar.

Begge sala skal gjennomførast i februar.

Etterpå vil selskapet ha eitt fleirbruksskip og fire forsyningsskip.