Grundig lei negativt miljøfokus

- Faktum er at den nyare norske norske offshoreflåten er den mest miljøvenlege flåten som eksisterer i verda i dag.
I ei rekkje artiklar og innspel har sentrale norske politikarar peikt på offshoreflåten når det er snakk om behovet for eit grønt skifte. Dette er Håvard Ulstein provosert over.
- Eg veit ikkje om dette skuldast at dei ikkje har fulgt med i timen, men sanninga er at dei siste ti åra har heile den norske offshorenæringa hatt fokus på å kutte utsleppa til både luft og vatn. Alle har investert store summar for å få dette til, og ein har også lukkast.
- I staden for å få kritikk, synst eg faktisk at vi fortener litt ros. Vi har nok utfordringar å slite med om dagen om vi ikkje også må slite med dette, seier han.
Vi møter Håvard Ulstein om bord i Island Crusader i Hjørungavåg. Den fem år gamle PSV-en er eitt av ti Island Offshore-skip som no ligg i opplag.
- Dette er ein av dei mest miljøvenlege båtane som er bygde. Denne båten burde vore i arbeid i Nordsjøen i staden for å liggje her, seier Ulstein.

Lavutsleppsskip

Om bord er det mellom anna to store motorar som går på LNG – flytande naturgass.
I løpet av båten si levetid har båten gått 25.000 timar på LNG-generatorane og berre 5.000 timar på dieselgeneratorane.
- Dette skipet slepper ut svært lite NoX, null SoX, null partiklar og 25 % mindre CO2. Kundane får både i pose og sekk ved at drivstoffet er billegare, samt at miljøavgiftene vert lavare.
- Island Crusader kosta Island Offshore 60 millionar meir å byggje enn om det var eit skip med konvensjonell framdrift. Noko av dette har vi fått tilbake frå NoX-fondet, men langtfrå det vi har satsa. Likevel ligg skipet her i opplag, seier Ulstein.

Toppar internasjonal liste

Kombinert med satsing på eksosreinsing, nye skrogformer, innslag av batteridrift og andre tiltak har dei nyare norske offshorefartøya vorte miljøvinnarar på havet – i staden for miljøtaparar, ifølgje Ulstein.
Han viser spesielt til den internasjonale ESI-lista (Environmental Ship Index) – med ei miljørangering av 5.200 skip. Her er det norske skip som dominerer, med norske offshorefartøy på rekkje og rad i toppen.
- Denne lista er det mange politikarar som ville ha godt av å sjå, seier Ulstein.

Haldningsendring

Ulstein viser også til den haldningsendringa til miljø det har vorte mellom sjøfolka som driv båtane, noko som også har gitt store gevinstar.
- Der er også ei sunn konkurranse mellom fartøya internt i reiarlaga, samt mellom kvart reiarlag på å operere mest mogleg effektivt og miljøvenleg.
Håvard Ulstein viser også til at ruteplanlegging gjer at båtane går akkurat fort nok til å nå fram med varene til rett tid.
- Ein er blitt meir bevist på kva som krev energi frå kraftverket ombord og stenger ned det som ikkje trengst.
- Båtane har også blitt tettare, slik at det praktisk tala er ingenting anna enn kjølevatn som blir sleppt ut i sjøen. Det er også investert i system for oppsamling av sludge (bl. a. brukt smørolje, red. mrk) og dette blir levert til land for gjenvinning. Alternativet vil vere å brenne det.

Bør premiere miljøskip

Ulstein seier at det framleis kan gjerast grep for å forbetre det miljømessige, men meiner at eventuelle nye tiltak vil koste mykje i forhold til effekten.
Han synst også at det er merkeleg at ein ikkje har fått på plass mekanismer som gjer at dei miljøvenlege skipa vert premierte ved tildeling av nye oppdrag.
- Om myndigheitene skulle gjort noko konkret, burde ein starta her, slik at ein fekk fjerna dei miljøforureinande skipa og fått dagens miljøvenlege skip i drift.

Milliardsatsing på miljø

Ulstein seier at han ikkje snakkar på vegne av eige reiarlag, men på vegne av heile offshorenæringa.
- Vi har sjølve investert fleire hundre millionar i miljøtiltak på våre skip, men for heile den norske offshoreflåten er det snakk om milliardar.
- Den norske offshoreflåten er heilt i front på miljø, og det vert difor så feil når politikarar og andre skal vise til offshoreflåten som ein miljøsyndar.
- Det fortener vi slett ikkje.