Har henta inn 8,4 millionar

Det er i stor grad eksisterande eigarar som har gått inn med 8,4 millionar kroner i ny kapital i selskapet, ifølgje marknadsdirektør Kjetil Aarseth.

Kapitautvidinga har skjedd i to omgangar, der den siste nyleg vart kunngjort i Brønnøysundregisteret.

Tikkio gjekk i minus i 2020, men snudde til eit lite pluss i fjor.

Fleire folk
Kapitalutvidinga er mellom anna brukt til å finansiere utviding av staben og utviklingsarbeid.

For et selskap som tener pengar på at det blir seld billettar til konsertar, festivaler og andre kulturarrangement vart koronapandemien eit tøft slag.

I 2019, siste år før koronapandemien kom, nådde Tikkio 8,9 millionar kroner i driftsinntekter. I 2020 fall inntektene ned til 3,5 millionar og i fjor var inntektene fem millionar.

I år passerte Tikkio driftsinntektene for heile 2019 allereie i september.

- Tikkio har lagt ned eit stort arbeid i internasjonal lansering og operer no i fleire europeiske land. Vi ser at vi i Noreg ligg langt framme når det kjem til digital betaling og at det gir oss ein stor fordel på den internasjonale marknaden, seier Aarseth

Enklare system
I tillegg til at koronapandemien ikkje lenger legg ein dempar på kultur- og underhaldningsbransjen får Tikkio draghjelp av at selskapet har vidareutvikla systemet sitt.

Det har gjort Tikkio-systemet enklare å ta i bruk, både teknisk og i høve til regel- og avtaleverk, ifølgje Aarseth.

Ifølgje proff.no har Tikkio 10 aksjonærar, med Ante og Lars Berg Giskeødegård sitt selskap ALH og Asbjørn Solevågseide og familie sitt selskap Ajea Invest som dei to største.