Har kjøpt verftseigedomen

I ei pressemelding opplyser Green Yard at selskapet har kjøpt eigedomen til verftet i Kvinesdal. Kjøpet er gjort frå selskapet Kvina Verft, Feda.

Eigedomen er på rundt 75 mål og inkluderer blant anna djupvasskaier, skipsverft, kraner og beddingar.

Green Yard opplyser i pressemeldinga at på området er alt som trengst for miljøvenleg resirkulering av skip, i tillegg til å handtere riggar i opplag.

Milepæl
Det blir vist til at verftseigedomen har djupe røter i lokalsamfunnet med ei historie som strekker seg fleire tiår tilbake i tid.

Kjøpet vert sett på som ein milepæl som vil gi selskapet betre mulegheiter til å utvikle seg framover.

- Med full kontroll over 'vårt eige hus' har vi ein sterkare base for å utvikle konsernet vidare, seier konsernsjef Hans Jørgen Fedog i pressemeldinga.

Selskapet viser også til at Green Yard nyleg fekk kontrakten på resirkulering av sju offshorefartøy, der tre skal resirkulerast på verftet i Feda og fire på Green Yard Kleven.