Havfisk kan kreve erstatning

Fiskedumpingsaka førte til at børsnoterte Havfisk ASA miste retten til å bruke "Hekktind" i fem månader i 2012, og i tillegg blei dømt til ei inndraging av 100.000 kroner.
Men no er skipperen ombord frikjent av Høgsterett. . Dermed er det ikkje grunnlag for korkje inndraging av retten til å fiske eller inndraging av 100.000 kroner, i følgje Kenneth Mikkelsen, partnar og leiar for fiskeravdelinga hos advokatfirmaet Simonsen Vogt Wiig.
- Utgangspunktet for å bli dømt til inndraging er at det må foreligge eit straffbart forhald, seier Mikkelsen.
Den regelen gjeld i følgje Mikkelsen både inndraging av 100.000 kroner som reiarlaget blei dømt til i lagmannsretten, og inndraging av retten til å fiske - som er eit såkalla forvaltningsmessig vedtak, gjort av Fiskeridirektoratet.

Bør gi erstatning

Etter frikjenning av skipperen kan reiarlaget no krevje at lagmannsrettsdommen om inndraging av 100.000 kroner blir tatt opp til ny behandling, og også kreve erstatning for tapt inntekt dei fem månadane "Hekktind" ikkje fekk fiske i fjor. Etter det NETT NO har grunn til å tru gikk "Hekktind" glipp av fangstinntekter på rundt 10 millionar kroner i den perioden båten vart utestengt frå fiske.
Mikkelsen meiner det bør vere heilt unødvendig for Havfisk å gå til erstatningsak mot Fiskeridirektoratet. Her bør staten erkjenne ansvar, og erstatning betalast utan at partane treng å møtes i rettsalen, meiner han.
- Fiskeridirektoratet har sanksjonert på eit ulovleg grunnlag, og då har dei og teke på seg eit erstatningsansvar, seier Mikkelsen.

Brei omtale

Fiskedumpingsaka skriv seg frå sommaren 2010, og etter at ein tilsett ombord filma at fisk vart spylt på sjøen.
Men var skipperen og reiarlaget å klandre? Etter dommen i Høgsterett er svaret nei for begge, meiner Mikkelsen.
Han meiner dommen og dreg opp ei prinsippiell viktig grense for kor mykje ansvar det er rett å legg på skipperen. Spørsmålet er om skipperen kan dømmast sjølv om han ikkje kjenner til at fisk blir dumpa, og dumping er i strid med retningslinene frå reiarlaget. Lagmannsretten svarte ja, Høgsterett nei. "En kaptein må likevel i alminnelighet kunne basere seg på at mannskapet har evne og vilje til å overholde de regler som det vet er grunnleggende for virksomheten", heiter det dommen i Høgsterett.
Reiarlaget melde sjølv saka til politiet etter at filmen vart vist i media, samstundes som Fiskeridirektoratet starta å arbeide med saka.
- Eg kjenner ikke til at vi har hatt tilsvarande saker av dumping eller miljøkriminalitet. Det gjenspeglar også vår reaksjon i saka, sa avdelingsdirektør Aksel Eikemo i Fiskeridirektoratet til FiskeribladetFiskaren 14. februar 2012.

Ingen kommentar

Mikkelsen meiner Fiskeridirektoratet har hatt ein uheldig praksis, med å både melde saker til politiet og samstundes arbeide fram mot ein såkalla forvaltningmessig sanksjon - som i "Hekktind"-saka var å inndra retten til å bruke båten i fiske.
Det kan føre fram til ei dobbelstraff. Formelt kan ein slik framgangsmåte vere i samsvar med den europiskemenneskerettskonvensjonen. Men etter Mikkelsens vurdering er framgangsmåten i strid med intensjonane både i menneskerettskonvensjonen og lovgivarens intensjon om at styresmaktene i slike saker må velge mellom å melde saka til politiet, eller reagere med ein forvaltningssanksjon. Enten eller, ikkje både og.
NETT NO har bede Fiskeridirektoratet kommenterer dommen og Mikkelsen sine vurderingar. Det har direktoratet takka nei til.
I sommar sende Havfisk ASA brev til Fiskeri- og Kystdepartementet med ein omfattande gjennomgang av saka, og Havfisk sitt syn på prosessen. Brevet er underskrive av konsernsjef Havfisk ASA og styreleiar i dotterselskapet Nordland Havfisk, Olav Holst-Dyrnes. I brevet ber han om at departement følgjer opp kritikken frå reiarlaget og skriv at "Inntil vi mottar tilbakemelding som omspurt ovenfor forbeholder vi oss retten til å be om en omgjøring av FKD (Fiskeri- og kystdepartementet, red. mrk) vedtak og eventuelt forfølge saken i rettsapparatet."
Departementet har førebels ikkje svart på brevet.
"Hekktind"-saka er ikkje den einaste som set søkelyset på forvaltingspraksis og rettspraksis i fiskerinæringa. .

Lette i reiarlaget

Dagleg leier Ari T. Josefson i Nordland Havfiske, seier selskap ikke har teke stilling til eit eventuelt erstatningkrav, eller til eit krav om å ta opp att dommen om inndraging av 100.000 kroner.
- Vi har tatt mot dommen med stor lettelse, og spesielt på vegne av kapteinen, seier Josefson.