Havfisk legg båtar i opplag

I løpet av hausten blir nokre av Lerøy Havfisk sine ti trålarar lagt i opplag. Grunnen er at reiarlaget har for lite att av fiskekvotane til at det er grunnlag for å fiske med alle fartøya.

"Gjenværende fangstvolum for 2024 er naturlig nok vesentlig redusert fra tidligere år, det er derfor ikke tilstrekkelig driftsgrunnlag for å holde hele flåten i drift i andre halvår.", heiter det i kvartalrapporten for 2. kvartal.

Les børsmelding her

Samanlikna med 2023 er torskekvoten redusert med 34 prosent, hyse med 43 prosent og sei i nord er kvotene redusert med seks prosent. Reiarlaget har dessutan fiska ein større andel av torskekvoten sin i første halvår i år enn i første halvår i fjor, går det fram av kvartalsrapporten.

Torsk er det økonomisk viktigaste fiskeslaget for reiarlaget, som er ein del av det børsnoterte konsernet Lerøy Seafood Group.

Fiskebåtreiarlaget har hovudkontor i Ålesund.

Reketråling sikrar delvis drift
Lerøy Havfisk-sjef Eldar Farstad talfestar ikkje kor mange og kor lenge fartøy vil ligge i opplag i andre halvår, men seier dei fem trålarane som også fiskar reker har grunnlag for å drive heile hausten.

Lerøy Seafood Group offentlegjer ikke kvartalstal for datterselskapet Lerøy Havfisk, men rapporterer tal for villfisksegmentet (sjå tabell under), som også omfattar fiskeindustriselskapet Lerøy Norway Seafoods.

Samla gjekk villfisksegmentet med underskot på drifta i 2. halvår.

Store kvotekutt
Neste år er det varsla det tredje store kuttet i torskekvoten på rad, og reduksjonen i torskekvoten i fjor viste seg allereie i 2023-rekneskapa til fleire fiskebåtreiarar.

I år blir konsekvensen mellom anna opplag for ein del av Lerøy Havfisk-flåten.