Havila Kystruten har starta billettsalet

På nettsida til Havila Kystruten er salet av billettar til ei reise langs norskekysten i gang.

Første tur som ligg ute, med Havila Castor, startar tysdag 6. juli og skal vere framme i Kirkenes mandag 12. juli. Både ein veg og tur-retur-billett kan kjøpast.

Ein einvegsbillett kostar frå 20.580 til 133.000 kroner, alt etter standard og kor stor del av billettprisen du vi betale ved bestilling.

Andre tur som ligg ute for sal med Havila Capella, startar frå Bergen søndag 11. juli.

Forseinka skip
Havila Kystruten vann konkurransen om å få segle passasjer- og godstransportstrekninga Bergen-Kirkenes saman med Hurtigruten då det statstøtta sambandet sist vart lyst ut. Havila Kystruten skal segle med fire skip.

Gjeldande anbodsperiode tok til 1. januar i år, men koronarestriksjonar har gjort at sambandet ikkje har avgangar no.

For Havila Kystruten, som enno ikkje har fått skipa sine, har reiserestriksjonane delvis vore hell i uhell fordi selskapet har ikkje vore nøydd til å leige inn reserveskip for å oppfylle kontrakten.

Klar i mai/juni
NETT NO har ikkje lukkast å få kontakt med administrerande direktør Arild Myrvoll i Havila Kystruten om status for skipsleveringane.

I januar i år sende selskapet ut ei melding om at dei to første skipa truleg er klare for levering frå Tersan Shipyard i Tyrkia i mai/juni.

Myrvoll sa i pressemeldinga at han er skuffa, og han beklagar forseinkingane både for dei som skal reise med skipa, og for dei tilsette.

– Forseinkinga hadde vore meir utfordrande i ein normalmarknad, men koronaen gir også reiserestriksjonar slik at færre kan reise både til Norge, og i Norge enn i eit vanleg år, sa han.