Fjord1 blir halvt amerikansk

- Forhåpenlegvis er dette ting som fell på plass i løpet av sommaren, seier Per Sævik til NETT NO om arbeidet med å endre eigarfordelinga i børsnoterte Fjord1.

Han fortalde om den komande endringa i selskapet i ein presentasjon for statsminister Erna Solberg, då statsministeren vitja Sunnmøre søndag 20. juni.

Gjennom datterselskapa Havilafjord, Havilafjord Holding og Havilafjord Holding 2 eig Sævikfamiliens selskap Havila Holding 86 prosent av børsnoterte Fjord1.

Full kontroll
Havila Holding tok i mai 2020 full kontroll over Fjord1 saman med sin amerikanske partner Vision Ridge Partners etter å ha kjøpt ut Fredrik W. Mohn sin aksjepost på 18,46 prosent for 877 millionar kroner.

Etter kjøpet av Mohn sine aksjar kom Havila Holding opp i 86 prosent eigarskap. No skal eigarposten reduserast.

- Planen er et dei (den amerikanske partnaren, red. merk) skal kjøpe seg opp i selskapet slik at det blir to likeverdige partnarar som eig 50/50, seier Sævik.

Som ein del av transaksjonen får også mindretalsaksjonærane tilbod om å kjøpe seg ut.

- Det blir gitt eit tilbod til dei øvrige aksjonærane, seier Sævik.

Kvartalsrapporten til Fjord1 for 1. kvartal 2021 omtalar planane slik: "Havila Holding AS og det amerikanske investeringsselskapet Vision Ridge Partners kontrollerer 88 prosent av aksjekapitalen, og har kunngjort at dei vil kjøpe ut dei resterande aksjonærane i Fjord1. Om eit slikt tilbod vert lagt fram og godteke, kan Fjord1 eventuelt bli teke av Oslo Børs."

4,3 milliardar
Ved stengetid fredag 18. juni var kursen på Fjord1-aksjen 43,30 kroner. Det verdset selskapet på 4,3 milliardar kroner og aksjeposten Fjord1 skal selje til 1,5 milliardar kroner.

Havila og Vision Ridge Partners har tidlegare opplyst at planen er utvikle Fjord1 til eit integrert transport- og reiselivsselskap, og der partane også skal samarbeide om Havila Kystruten.

Aksjekjøpet frå Mohn i fjor var eit steg på vegen mot målet, og transaksjonen vart kritisert for å vere til gunst for Sævik-familien og dårleg for minoritetseigarane.