Investerte over 115 millionar i fabrikken i fjor

To faktorar er sentrale for Nordfjord Kjøtt-sjef og medeigar Geir Egil Roksvåg, stort volum og stadig effektivisering av drifta for kunne konkurrere i ein tøff bransje.

I fjor investerte Nordfjord Kjøtt, som er det dominerande selskapet i Nordfjord Kjøtt-konseret, 115,9 millionar kroner i nytt produksjonsutstyr til anlegget i Loen.

Marginane er under konstant press, så difor er det heile tida naudsynt med tiltak som sikrar stor produksjonsmengde og effektiv drift, skriv selskapet i årsmeldinga.

Inntektene steig til ein ny topp i fjor, og lønsemda auka (sjå tabell).

Slutt for slakteri
Etter første kvartal i fjor la Nordfjord Kjøtt-konsernet ned slakteriverksemda i datterselskapet Nordfjord Kjøtt Slakt. Årsaka var sviktande lønsemd kombinert med store investeringsbehov for å innfri nye miljøkrav. Slakteriverksemda hadde 22 fast tilsette og seks tilsette på kort- eller deltid.

No er konsernet ei reindyrka kjøttnedskjering- og kjøttforedlingsbedrift. Den verksemda skjer i Nordfjord Kjøtt, som sysselsette 315 årsverk i fjor. 

Butikk-kjeda Rema er Nordfjord Kjøtt sin dominerande kunde.

Familieigd
Morselskapet i Nordfjord Kjøtt-konsernet er selskapet Legula.

Det er eigd av Malin og Tom Roksvåg og deira far Geir Egil Roksvåg, gjennom selskapet Gemto.