Betalar meir i formuesskatt enn overskotet i fjor

Nordfjord Kjøtt i Loen har lagt bak seg eit år med ny vekst i omsetninga, men knappare marginar enn tidlegare. Av ei omsetning på nær 2,8 milliardar i 2023, vart resultatet før skatt på knappe 23 millionar (sjå tabell under).

Det gir ein resultatmargin på 0,8 prosent.

– Vi får håpe at vi kan gjere det betre i åra framover, seier Geir Egil Roksvåg til Nett No om 2023-resultatet.

Han er dagleg leiar i Nordfjord Kjøtt og styreleiar i Legula-konsernet.

Roksvåg eig også nokre få prosent av aksjane i eigarselskapet Gemto As, medan barna Malin og Tom eig 49 prosent kvar. Kontrollen er likevel hos senior, som har A-aksjar.

Kjøttprodusenten i Stryn er mellom anna hovudleverandør av foredla kjøttprodukt til Rema 1000-kjeden, som blir selt over heile landet.

30 av 80 millionar går til formuesskatt
Trass det Roksvåg meiner er eit svakt resultat, vart det teke utbyte frå Legula As på 80 millionar etter fjoråret. Legula er morselskapet til Nordfjord Kjøtt, medan Gemto er eigarselskapet til Roksvåg-familien.

Då Nett No spør om årsaka til det store utbytte, ber Roksvåg sin medarbeidar og COO, Alexander Hopland, om å forklare.

– 30 millionar av utbytte går til å dekke rekninga for formuesskatten i 2023, resten er tilført eigenkapitalen i morselskapet, fortel Hopland.

– Kva tenkjer dokke om å ta eit slikt utbytte i eit år med eit knapt overskot?

– Reint prinsipielt er det utfordrande å ta ut titals millionar du kunne brukt til å vidare investeringar og utvikling for selskapet, svarar Hopland.

Meiner regjeringa gjer det vanskeleg å drive industri
Å vente med å ta utbytte i påvente av eit eventuelt politisk skifte og endring av skattetrykket fleire år fram i tid, er ikkje eit alternativ.

– Vi er nøyd til å gjere det i år. Samtidig er det politiske landskapet ganske diffust. Det er vanskeleg å drive industri med så lite føreseieleg næringsspolitikk som dagens regjering legg opp til, seier Roksvåg til det.

Nordfjord Kjøtt-eigaren er tydeleg på at formuesskatt på sokalla arbeidande kapital tynger bedrifta meir enn han likar.

– Vi kunne betalt meir skatt på ordinær måte med selskapsskatten. Då er det frå eit overskot, og det er meir «fair», seier han.

Nye reinsekrav kan bli kostbare
Roksvåg peiker vidare på kostnadene for innsatsfaktorane som den største utfordringa – som er utanfor deira kontroll.

– Det er politikken som avgjer korleis det går framover, seier han.

Nye reinsekrav som følgje av EU sitt industriutslippsdirektiv, er ei anna utfordring for Stryn-bedrifta.

– Det ytre miljøet med vatn og avløp, vil bli ein stor kostnad for oss, seier Roksvåg.

Han fryktar at kostnadene for kjøttprodusenten kan ende mellom 50 og 100 millionar kroner – men påpeiker at det er eit anslag.

Usikkerheit kring korleis norske styresmakter vil følgje opp krava, er ein óg faktor, som gjer situasjonen meir vanskeleg.

Investeringar for 100 millionar
Kjøttprodusenten jobbar heile tida med å betre sjølve anlegget og drifta.

– Vi har i fleire år drive med kvalitetsheving og effektivisering, seier Roksvåg.

Det er blitt gjennomført, og går føre seg, investeringar for opp mot 100 millionar i det som skal gi meir berekraft og effektiv produksjon.

Det gjeld til eksempel utstyr som reduserer bruk av vatn ved tining, og samtidig hevar kvaliteten.

– Vi har også investert i nytt pakkeutstyr som lagar posar av filmrullar. Dette er raskare og meir miljøvennleg enn tidlegare. Vi jobbar kontinuerleg med å redusere fotavtrykket vårt på miljøet, legg Roksvåg til.

Svingane marknader og konstant marginpress
Også i årsmeldinga frå Legula-konsernet blir det påpeika at effektiv produksjon er avgjerande for å lønnsam drift. Med svingane marknader og konstant marginpress, er det nødvendig å jobbe kontinuerleg med dette, skriv styret.

Drifta i Nordfjord Kjøtt-slakteriet vart avvikla i vår. Det er for tida heller ikkje drift i Loen Kjøtt As.