Istad knuste alle tidlegare rekordar

2023-rekneskapen til Istad Kraft viser eit rekordår for straumselskapet med hovudkontor i Molde.

Trass i inntektene sank frå 724 til 649 millionar, vart overskotet med god margin det beste selskapet har levert.

Resultat før skatt enda på 90 millionar - drygt 20 millionar over førre rekord i 2022 (sjå tabell under).

Det gode resultatet gjer selskapet i stand til å betale eit konsernbidrag på drygt 50 millionar kroner til eigarselskapet Istad Kraft. Her er det Molde kommune og Tussa Kraft som er største eigarar med 34 og knappe 33 prosent av aksjane.

Høge kraftprisar og god vassdisponering
All kraftproduksjonen i Istad-konsernet er samla i selskapet, som har tre kraftverk: På Istad, i Angvika i Gjemnes og Meisal i Nesset.

– På grunn av høge kraftprisar og god vassdisponering, oppnådde produksjonen eit svært godt økonomisk resultat i 2023, skriv styret i årsmeldinga.

Den samla produksjonen i fjor vart på 209,2 gigawatt, som er litt under normalproduksjon. Selskapet fekk i snitt 55,7 øre per kilowattime – knappe 12 øre over middels spottpris i straumprisområde.

Ventar god inntening framover
Istad Kraft ventar god og sikker inntening frå vassanlegga i åra framover. Produksjonsanlegg er fornya og teknologisk oppdatert, slik at drifta er blitt enklare, skriv styret i årsmeldinga.

Selskapet har óg ansvar for kraftomsetninga i Istad. Ei app-løysing og fleire innovasjonsprosjekt har bidrege positivt på dette området.

Fjernvarmeverksemda dreg ned resultatet og her vil det bli vurdert tiltak, heiter det vidare i årsmeldinga.

Konsernrekneskapen for Istad As er ikkje offentleg enno.