Kommersiell 3D-printing klar neste sommar

I vår skal Robotek avslutte eit forprosjekt der selskapet har testa ut bruk av 3D-printing for å produsere deler, saman med industribedrifter på Sunnmøre.

No er målet å få Innovasjon Norge med på å finansiere eit større prosjekt, der Robotek og samarbeidsbedriftene vil ha utvikla 3D-printa deler som er klare for kommersiell produksjon frå sommaren 2022.

Småskala
I dag har Robotek 3D-printerar som kan skrive ut produkt i kompositt- og plastmateriale. I tillegg har Robotek avtalar med selskap som kan skrive ut produkt i metall.

Poenget med 3D-printing ert mellom anna å lage produkt som skal produserast i så små mengder at det ikkje vil løne seg å sette opp ei automatisert produksjonsline, seier dagleg leiar Arne Tande i Robotek.

Tanken er at Robotek både kan bidra til å utvikle 3D-printa produkt og stå for produksjonen fram til brukarane eventuelt treng så mange produkt at det vil løne seg for dei å skaffe seg eigne 3D-skrivarar.

Utvikle produksjonsmiljø
Robotek er blei oppretta i 2016 for å styrke produksjonsmiljøa på Nordvestlandet, med Arne Tande, tidlegare sjef for Rolls-Royce Marine i Brattvåg som primus motor.

Målet var å bidra til at bedriftene held på produksjonen her i Noreg, og aller helst flyttar heim ein del av den produksjonen som er flytta ut.

Selskapet har 19 bedrifter og personar som aksjonærar, med Arne Tandes selskap Offshore & Industry Support, Møre Trafo, Nyborg, Nils N Finnøy Motorfabrikk, Erling Myklebust Mek. Verksted og Nogva Motorfabrikk som dei største.