Har flytta inn i nytt gjenbruksbygg

Denne veka kunne drygt 200 Kongsberg Maritime-tilsette endeleg flytta inn i det nye kontorbygget - med noko attåt – i utkanten av Ulsteinvik sentrum.

Strengt tatt er det ikkje eit nytt bygg, ettersom konstruksjonen til dei tidlegare lokala fekk stå.

– Vi strippa det ned til betongen og bygde alt opp att etter dagens standard. Det har vore eit stort løft, fortel Dag-Johan Skarbø.

Den tidlegare plass-sjefen har leia prosjektet med det 5663 kvadratmeter store bygget.

Har nytta lokale leverandørar
Satsinga blir omtala som eit miljøbygg og oppfyller dagens Tek17-krav. Næringsbygget er også det første på søre Sunnmøre som er sertifisert etter Breeam-Nor-standarden «Very Good».

For å kome dit har dei mellom anna bora 19 energibrønnar ned til 290 meter for å hente opp varme dei brukar til heile anlegget.

– Det skal vere den beste standarden, påpeiker Nils Aude Arnesen som har tittelen «facility manager».

– Gjennom prosjektet har vi også vore med å lære om Breeam-Nor standaren i lag med lokale konsulentar og firma. Vi har eigentleg berre brukt lokale leverandørar, seier Arnesen.

Sporstøl Arkitekter har teikna bygget, medan firma som HS Rise Bygg, Conplan, Hareid Group, Rørservice og Riksheim i Ålesund er nokre av dei som har hatt arbeid på prosjektet.

Vil ta naturen inn i bygget
Gro Anita Engh har no teke over jobben som plass-sjef, eller site-ansvarleg ved Ulsteinvik-avdelinga.

Ho er strålande nøgd med korleis arkitektane har forsøkt å «ta naturen inn i bygget», eller biofili som det heiter på fagspråket.

Difor er det ein ni meter høg plante frå golv til tak ved inngangspartiet og store vindauge ut mot landskapet. I lokalet møter vi kongler og trestubbar dandert på veggane.

– Huset er betre utnytta. Likevel er kontora generøse og vi har fleire sosiale soner enn vi hadde før. Heile utforminga som arkitektane har gjort, er heilt fabelaktig. No er vi alle samla - og det er kjempekjekt, seier Engh om den nye arbeidsplassen.

Har samla fleire avdelingar
For nybygget handla ikkje berre om ei naudsynt totalrenovering av kring 260 kontorplassar. Det var også eit grep for å samle fleire avdelingar under same tak.

Avdelinga for ettermarknad med godt over 100 tilsette, i mange år vore i eit anna bygg med ein veg i mellom.

– Fleire etasjar er bygd opp likt, og kontora er i stor grad like store, i tillegg til at det er ein del team-kontor. Det gjer ikkje skilnad på dei ulike avdelingane og alle har det same arbeidsmiljøet, fortel prosjektleiar Dag-Johan Skarbø.

I kvar etasje er det møterom, stillerom og eigne kontor for dei som er på besøk. Her er også moderne kantine, romsleg treningsrom og garderobar, i tillegg til «showroom» for kundebesøk og testlokale med vindauge inn til produksjonen.

– Bygget er også eit bevis på at Kongsberg verkeleg satsar i området, legg Skarbø til.

– Litt som å kome heimatt
På veg gjennom bygget møter vi Nina Kopperstad og Lone Reite i samtale ved eitt av mange pauseområder i lokalet.

– Her har vi det veldig fint. Også var det litt som å kome heimatt, seier Kopperstad om å flytte inn der ho har jobba i tidlegare.

Ho jobbar med innkjøp og har meir enn 30 års fartstid i bedrifta. Den siste tida har ho vore på «flyttefot» til avdelingane på i Hjørungavåg og Fosnavåg medan ombygginga i Ulsteinvik har gått føre seg.

Kollega Lone Reite jobbar med planlegging og logistikk og har som dei fleste andre – fått nytt kontor med utsikt til landskapet. Dagen føre kunne ho sjå folk gå på Osberget – eit lokalt turmål – frå kontorstolen.