Like før koronaepidemien kom og store deler av aktiviteten i samfunnet vart stengt samla Hageland Tilseth kundar som ville lære meir om dyrking av matvekstar i hagen. Det arrangementet kunne butikken strengt tatt spart seg, for koronaepidemien har uansett gjort Noreg til ein nasjon av hagebønder i år.
Hagelandkjeda har hatt ein vekst i salet på 45 prosent i år, og alt av matvekstar har auka enda meir. Settepoteter til dømes. Hos Tilseth var det utseld i god tid før potetene burde settast i jorda, og det var typisk for heile landet.
- Det kunne vi berre seld så enormt mykje meir av, seier Tilseth.
Neste år skal ho bestille inn minst dobbelt så mykje settepoteter. For det første har det vore frustrerande å ikkje ha nok til alle kundane som ville kjøpe og for det andre trur Tilseth at erfaringane frå i år skaper ei varig større interesse for hage og matproduksjon i eigen hage - til glede for hagesenterbransjen.

80 prosent opp

Aller mest opp har salet av hagemøblar gått, 80 prosent i følgje Hageland-kjeda sentralt.
Etterspørselen etter møblar til hage og terasse merkar mellom andre Formfin i Sykkylven (som sel møblane gjennom Bohus-kjeden).
Omlag 10 prosent av driftsinntektene kjem frå utemøbelkolleksjonen, seier Formfin-sjef Steinar Magne Myrset. Den andelen har vore aukande sidan Formfin satsa på utemøblar i 2017. Hittil i år ligg salet av utemøblar 15 prosent over tilsvarande periode i 2019.
Folk kjøper også meir innemøblar. i år mot mai i 2019 og Ekornes melde fredag at selskapet vil bruke helgar og ferie til å få unna alle bestillingane som kom etter fleire land letta på smitteverntiltaka.

Bygger terasse

Byggvarebransjen merka den positive koronaeffekten nesten frå første dag. Folk innstilte seg på å vere heime, truleg også i sommarferien, og sette i gang med å pusse opp og utbetre hus og eigedom, først innandørs så utandørs.

- Det har vore rett i taket i lengre tid, sa Rune Koppen, dagleg leiar og eigar av byggevareselskapet Koppen Industrier i Volda til NETT NO i slutten av april i år.
Tal frå bransjeforeininga Virke Byggevarehandel viste at privatkundar handla for 19,7 prosent meir av material, maling og andre byggevarer i mars i år enn i mars 2019.

Sykkelmangel

2020 starta dårleg og koronaepidemien gjorde at det såg ut til å bli enda verre, fortel dagleg leiar Bjørn Valderhaug i Sunnmøre Sport Holding som driv sju heil- og deleigde sportsbutikkar på Sunnmøre og i Nordfjord.
No har nokre av butikkane alt henta inn det tapte og meir til samanlikna med salet i same periode same i fjor, medan fleire av butikkane er like ved.
Etter påske tok det av. I mai har butikkane hatt frå 20 til heilt opp i 85 prosent auke i salet, samanlikna med mai i fjor.
Frluftsutstur, tursko, syklar og ikkje minst el-syklar går unna. For elsyklar byrjar marknaden å bli skrapa og for hengekøyer har etterspørselen passert tilbodet.
- Vi får ikkje tak i no, seier Valderhaug om hengekøyer.

Rekordsal

Hos båtforhandlar Rune Westad i Ferd er det lange dagar. Koronastilla varte ikkje lenge, og så langt er 2020 eit rekordår.
- Vi har ikkje mannskap til å handtere trykket, seier Westad.
Sel både nye båtar og båtar han tek i innbytte. Bruktbåtlageret er no uvanleg lite. Selskapet har slutta å annonsere brukte båtar til sals fordi forespørslane frå kundar som vil ha båt er så mange at annonser ikkje trengst.
Også Jan Arne Torset hos bubil- og campingvognforhandlaren Ferda fortel om eit krympande bruktlager, ein ideell situasjon for ein kapitaltung bransje. Vendepunktet kom i påska.
- Det er spesielt på brukt det har tatt av, seier Torset.
Førstegangskjøparar i bubil- og campingvognmarknande kjøper ofte brukt. I mai auka salet av brukte bubilar med 54 prosent og av brukte campingvogner med 20 prosent på landsbasis, ifølgje Opplysningsrådet for veitrafikken/Norges Caravanbransjeforbund.