Krever innsyn i havvind-saker

Venstres næringspolitiske talsperson, Alfred Bjørlo, reagerer på at fiskerinæringa og andre interessentar ikkje skal få innsyn i saker om tildeling av konsesjonar for vindkraft til havs.

– Dette er å bruke startskotet for norsk havvindsatsing til å skyte seg sjølv i foten. Venstre stiller seg fullt og heilt bak fiskerinæringa sitt krav om innsyn i havvind-saker - den gamle Ap-kulturen med hemmeleghald og beslutningar bak lukka dører må røskast opp i, seier Bjørlo i ei pressemelding.

Stortingspolitikaren har stilt fiskeri- og havministeren eit skriftleg spørsmål i Stortinget som Bjørnar Skjæran (Ap) no må svare på.

– Vil Fiskeri- og havministeren sørge for at fiskerinæringa og andre får innsyn på normal måte i tråd med offentleglova i saker om prekvalifisering og tildelingar av prosjektområde for vindkraft til havs, og er statsråden som øvste ansvarleg for norsk havpolitikk samd i at ei rask avklaring av at ein skal følgje vanlege demokratiske spelereglar, er svært viktig for legitimiteten i heile det vidare arbeidet med offshore vindkraft i Noreg, heiter det i spørsmålet frå Bjørlo.

Tidlegare i veka blei det kjent at Olje- og energidepartementet vil skrenke innskrenke innsynsretten i komande saker om prekvalifisering og tildelingar av prosjektområde for vindkraft til havs.

Også Fiskebåt, som er interesseorganisasjonen til havfiskeflåten, har reagert på avgjerda. Bransjen meiner innsyn i slike søknader vere viktig for å ta vare på fiskerinæringa og andre interesser i prosessen før og under tildeling av område for vindkraft.

Grunngivinga til departementet er at det er arbeidskrevjande å gå gjennom alle dokumenta, og at dei vil innehalde store mengder opplysningar som er hemmelege. Det gjer at det vil vere ressurskrevjande å vurdere eventuelle unntak for resten av dokumenta, har det blitt opplyst.

«Eit syltynt grunnlag»
Venstre meiner det er «eit syltynt grunnlag» for å innskrenke ålmenta sin innsynsrett.

– Uansett kva syn ein har på offshore vindkraft, er det i alle si interesse at dei prosessane vi no skal gjennom er opne, transparente og gir viktige andre aktørar i havområda som fiskerinæringa høve til å få innsyn og gi viktige innspel undervegs i prosessen, heiter det i uttalen frå Bjørlo.