Krill-strid utsett på nytt

Striden mellom dei to handlar om krilltrålaren Westcon skulle utruste for Stig Remøy-dominerte Rimfrost.

Etter den opphavlege planen skulle fartøyet vore i fiske etter krill i Antarktis. Skroget til krilltrålaren skulle slepast til Norge for utrusting ved Westcon-verftet i Florø allereie hausten 2022.

Den er framleis ikkje ferdig, men kven har ansvaret for det?

Det er partane ikkje samde om.

Stikk motsett syn
Remøy-selskapet meiner Westcon har handla i strid med kontrakten for nybygget, og at det mangla byggefinansiering. Difor har dei teke initiativ til ein voldgiftprosess, kom det fram i årsmeldinga.

Voldgift - eller skilsdom - vil seie at partane tek saka inn for ein domstol for mekling. Ein slik prosess er ikkje offentleg, slik hovudregelen er for saker som blir behandla av dei vanlege domstolane.

I årsmeldinga til verftsselskapet skriv styret at dei meiner det er «svært lite sannsynlig at endelig utfall av tvisten vil ha noen negativ regnskapsmessig konsekvens». Og i ein epost til Nett No tidlegare i år vart påstanden om manglande byggefinansiering kalla løgn.

Utsett på ubestemt tid
Øystein Matre i Westocon Yards seier til Nett No at voldgiftsaka er utsett, og at det per i dag ikkje er sett eit nytt tidspunkt for når den skal avviklast.

Ut over det har han ingen kommentarar.

Skroget var først forseinka frå det tyrkiske Tersan-verftet. I fjor vart skipsbyggingsavtalen med Westcon kansellert. Reiarlaget opplyste då at dei ville ferdigstille nybygget ved eit anna norsk verft.

Kva verft som skal fullføre arbeidet er ikkje kjent.