Rimfrost varslar betydeleg erstatningskrav

Rimfrost-reiarlaget til Stig Remøy har varsla eit betydeleg erstatningskrav i striden med Westcon om bygging av eit nytt krillskip.

Bakgrunnen er at dei meiner Westcon har handla i strid med kontrakten for nybygget.

Verftsselskapet meiner på si side at Rimfrost tyr til løgn - og at det er «svært lite sannsynlig» at dei tapar saka.

Det var i fjor det blei det kjent at Herøy-selskapet og verftsselskapet med hovudkontor i Ølen var i pengekrangel rundt bygginga av ein 120 meter lang fabrikktrålar.

Då vart det hevda at striden stod om krav på kring 276 millionar - men partane har ikkje stadfesta dette.

Meiner verftet har handla i strid i kontrakten
Opplysningane om erstatningskravet frå Rimfrost kjem frå i årsmeldinga til Olympic Group for 2023.

Remøy-selskapet meiner Westcon har handla i strid med kontrakten for nybygget og at det mangla byggefinansiering. Difor har dei teke initiativ til ein voldgiftprosess, skriv styret i årsmeldinga.

Voldgift - eller skilsdom - vil seie at partane tek saka inn for ein domstol for mekling. Ein slik prosess er ikkje offentleg, slik hovudregelen er for saker som blir behandla av dei vanlege domstolane.

– Skal til botnen i saka
Stig Remøy vil ikkje utdjupe fleire detaljar kring saka enn det som kjem fram i årsmeldinga, men seier dette:

– Dette er alvorleg og vi skal til botnen i saka, seier han til Nett No.

Erstatningskravet frå Rimfrost er retta mot Westcon Yards As og Westcon 39 As, som er involvert i tvisten. Remøy opplyser at saka blir ført i Bergen i oktober.

Meiner det er lite sannsynleg med tap
Westcon meiner på si side at det ikkje er grunnlag for kravet frå Remøy-selskapet.

I årsmeldinga til verftsselskapet skriv styret at dei meiner det er «svært lite sannsynlig at endelig utfall av tvisten vil ha noen negativ regnskapsmessig konsekvens».

Det er likevel gjort avsetningar i rekneskapen som tek omsyn til usikkerheita kring utfallet av saka.

Skuldar Rimfrost for løgn
Westcon-sjef Øystein Matre skriv til Nett No i ein sms at «Rimfrost må snakke for sin syke mor og det er synd de tyr til løgn».

Han avviser samtidig opplysningane i årsmeldinga til Olympic Group om at verftet mangla byggefinansiering.

«Westcon har naturligvis hatt byggelån til prosjektet hele veien. Dessverre evner, eller har ikke Rimfrost vilje til å fullfinansiere prosjektet», skriver han videre.

Til dette svarar Stig Remøy at opplysningane i årsmeldinga er korrekt - og at dei ventar at den varsla voldgiftsaka vil vise det.

Fleire år forseinka
Skroget til krilltråleren skulle etter planen slepast til Norge for utrusting ved Westcon-verftet i Florø allereie hausten 2022. Slik vart det altså ikkje.

Skroget var først forseinka frå det tyrkiske Tersan-verftet. I fjor vart skipsbyggingsavtalen med Westcon kansellert. Reiarlaget opplyste då at dei ville ferdigstille nybygget ved eit anna norsk verft.

Kva verft som skal fullføre arbeidet er ikkje kjent. Etter det Nett No forstår, vil det óg avhenge av utfallet av striden med Westcon.

Har store forventingar
Nett No har fleire gonger omtala bygginga av det nye Rimfrost-fartøyet. Stig Remøy har store forventingar til det nye skipet.

Om bord på trålaren skal krillen bli til helsekostprodukt og kosttilskott med ein eigenutvikla metode. Remøy har mellom anna vist til undersøkingar som synte at laks fôra på Rimfrost-krill, hadde betre vekst enn ved konvensjonell fôring.

Etter planen skulle det nye fartøyet vore i gong med fiske i Antarktis i fjor. Rimfrost-reiarlaget har ikkje vore ute på fiske med eigen båt sidan 2016, og selde i fjor framleis av lageret dei hadde frå den gong.