Sidan september 2021 har Vard Langsten i Tomrefjord arbeidd med å utruste det første av i alt tre kystvaktskip Vard byggjer for Forsvaret.
No er skroget til kystvaktskip nummer to under slep frå Vard sitt skrogverft i Tulcea i Romania. Slepet er venta å ta omlag ein månad, ifølgje Forsvaret.
Det første kystvaktskipet skal overleverast til Forsvaret i år, skroget som no er under slep skal vere klart til overlevering neste år. Det tredje kystvaktfartøyet skal vere ferdig i 2024.
Milliardoppdrag
Kontrakten om bygging av tre nye skip i Jan Mayen-klassen hadde ein verdi på rundt 5,4 milliardar kroner då avtalen blei offentleggjort.
– Vi vil ha mellom 400 og 500 arbeidarar på dette prosjektet fram til det nærmar seg leveringsfase. Det vil vere tilsvarande for dei to neste skipa, sa prosjektleiar Roar Gjerde i Vard så skroget til det første kystvaktskipet kom til Vard Langsten i fjor.
Publisert: 18.02.2022 09:21
Sist oppdatert: 18.02.2022 09:36
