Lokka turistane med velkomstpakkar

Sommar er turisttid i Ålesund og stadig fleire besøkande tek turen til byen.

Måndag var Ålesund Sentrumsforening på tur rundt i byen for å møte flest mogleg turistar. Målet var å gi vekk velkomstpakkar frå lokale bedrifter – og sjølvsagt bidra til handel i nærmiljøet.

Leiar Lisa Mari Sæther har inntrykk av at dei fleste i den lokale handelsstanden er positive til turistbesøket – sjølv om det naturleg nok er ulike haldningar.

– Mange av butikkane i sentrum lever i stor grad av cruiseturistane som kjem til byen om sommaren, seier ho til Nett No.

Nordmenn brukar mest pengar
I årets sesong kjem det rekordmange cruiseturistar til byen. Tidlegare undersøkingar har vist at slike reisande legg att mindre pengar, samanlikna med individuelle reisande som i større grad nyttar lokal overnattings- og spisetilbod

Leiaren av sentrumsforeininga fortel at det også er stor variasjon mellom ulike nasjonalitetar.

– Norske turistar er dei som brukar mest pengar. Dei veit kva ting kostar i Norge, og betalar for seg. Vi møtte mange nordmenn både med bubil og i småbåthamna då vi var ute på runden vår, og dei er viktige gjestar å ta vare på i byen vår, seier Sæther.

Også USA-turistar betalar godt
Turistar frå USA kjem på ein god 2. plass over kven som gjerne legg att mest pengar.

– Amerikanarane blir gjerne lengre periodar og er interessert i å handle. Den svake krona gjer det truleg lettare for turistane å bruke pengar no for tida, legg ho til.

Tyske bubilturistar har vore berykta for å bidra lite til lokaløkonomien, men Sæther påpeiker at også desse handlar mat og norske varer.

– Til eksempel delikatessebutikkar i sentrum fortel at dei har ein del tyske turistar innom, fortel ho.

Håpar på årleg tradisjon
I velkomstpakka som blei delt ut til dei besøkande turistane måndag, var det mellom anna rabattkupongar, praktisk informasjon, kart og informasjon om brann- og sikkerheit.

Alt frå hotell, spisestader, butikkar og andre næringsaktørar deltok – samen med det lokale brannvesenet.

– Vi håpar at dette kan bli ein årleg tradisjon som vi kan dra i gong gjennom heile sommaren, og få med oss endå fleire på laget, seier Sæther.