Mat og drikke gir ringverknader 

Lenge var det berre ein fiskebutikk med nokre få  bord i eit hjørne på gateplan i hamnevesenet sitt bygg i Måløy.  

No er Havfruen Måløy ein populær restaurant med 130 sitteplassar. Møteplassen har hatt vekst og gått i pluss frå starten i 2020.  

• Jul- og nyttårsdagane legg redaksjonen ut ei rekkje artiklar som tidlegare er publiserte i årets NETT NO-magasin. Artiklane er opne også for ikkje-abonnentar. 
• Les heile magasinet her

I nabolaget driv Kristian Hamnaberg delikatessebutikken og lunsjkafeen Kb77 på dagtid og den kombinerte vinbaren og restauranten Kadaver på kveldstid. Store delar av næringslivet i Måløy er med på eigarsida.  

Restaurantbransjen er ikkje lenger berre eit Ålesund og Molde-fenomen.   

Nett No si oversikt over resultata til restaurantbransjen på Nordvestlandet i 2023 omfatta 36 selskap, 14 av dei med adresser utanom Ålesund og Molde.  

Grunnleggande viktig  
Sindre Kvalheim meiner dei to restaurantane i Måløy er eit grunnleggande viktig tilbod for byen.  

Han er sjef i it-selskapet Localhost, investor, heimflyttar og ein av dei som dreiv fram etableringa av datasenteret Lefdal Mine Datacenter i den nedlagde olivingruva mellom Måløy og Nordfjordeid.  

– Vi treng begge, seier han. – Å har dette restauranttilbodet er eitt av trekkplastera for å lokke yngre folk til Måløy-regionen og behalde dei der, anten dei er heimflyttarar eller tilflyttarar.  

Ute i restauranten hos dagleg leiar Margrethe Gangsøy og kjøkkensjef Anne Cecilie Hegnes i Havfruen Måløy er det fullt hus ein onsdagskveld i haust. Her er ei stor gruppe frå ein fiskerikonferanse, her er par, vener og større familiar.  

Fullt hus er ikkje uvanleg, og alt tidleg i september i år visste dei at julebordsesongen 2024 ville bli rekordbra.  

Gangsøy er grunnleggar og fekk med seg Hegnes litt etterpå, både som tilsett og medeigar. At dei sjølve deltek i drifta, er ein del av forklaringa på det økonomiske resultatet, meiner dei. 

Og så er det bra med ein eigenskap til.  

– Vi er skikkeleg stå-på-folk, og seier ja til det meste, seier Gangsøy.  

Over ein halv milliard  
Til saman hadde dei 36 restaurantane på Nordvestlandet i Nett No-oversikta over ein halv milliard kroner i driftsinntekter i 2023.   

Hadde dei vore samla i éi bedrift, ville dei ha fått plass blant dei hundre største bedriftene på Nordvestlandet, målt etter inntekt.  

Nett No-oversikta omfattar dessutan berre ein del av bransjen. Gatekjøkken, McDonalds og Burger King-restaurantar, kjøpesenterkafear, cateringbedrifter og hotellrestaurantar er mellom dei som ikkje er med.   

Berre serveringsstadane på Amfi Moa åleine omsette for 242 millionar kroner i 2022, ifølge ei oppteljing Amfi Moa gjorde for Nett No i fjor.   

Pioneren  
Etter at Ove Fjørtoft opna restauranten Sjøbua i Ålesund i 1987, var han lenge sjef for den einaste restauranten i denne klassa på Nordvestlandet. Det var hit forretningsfolk gjekk for å imponere gjestar og feire ein god handel.  

Det tok tid, men etter kvart kom fleire etter.   

– Det er mange fleire stjernerestaurantar, seier Fjørtoft om status for restaurantbransjen på Nordvestlandet i dag.   

I tillegg peikar han på fleire andre faktorar bak restaurantveksten:  

• Fleire rimelegare restaurantar, spesielt basert på utanlandsk kjøkken.  
• Enklare å få skjenkeløyve.  
• Fleire ledige lokale på bakkeplan fordi sentrumsbutikkar er lagde ned eller flytta. 
• Større tilbod av take away-restaurantar.  

Sjølvforsterkande  
Egon-sjef Veronika Kalland Aurdal flytta til Ålesund for elleve år sidan. Då hadde ho allereie arbeidd fleire år i kjeda i Oslo.  

Den gongen var overgangen frå restaurantmarknaden i Oslo til Ålesund veldig stor.  

– Det var som å kome på bygda, sa ho til Nett No for to år sidan, då bransjen var i ferd med å kome seg ut av koronapandemien.   

I dag er marknaden i Ålesund ein heilt annan.  

– Det har vore ein enorm vekst, sa Kalland Aurdal til Nett No.  

Mellom anna er også lunsjmarknaden veksande, og Kalland meiner veksten er sjølvforsterkande.  

– Vi dreg meir folk ut for å ete når det er meir å velje i, sa ho.

• Jul- og nyttårsdagane legg redaksjonen ut ei rekkje artiklar som tidlegare er publiserte i årets NETT NO-magasin. Artiklane er opne også for ikkje-abonnentar. 
• Les heile magasinet her

Større plass i lommeboka  
Dagleg leiar Tom Anker Skrede i reiselivsorganisasjonen Destinasjon Ålesund og Sunnmøre  meiner Ålesunds-restaurantane tener på både byens rolle som forretningssentrum, på den generelt større interessa for mat og på større vilje til å gå på restaurant.  

Skrede meiner restauranttilbodet er uvanleg stort for ein by på Ålesund sin storleik.  

– I forhold til folketalet har vi mange restaurantar i byen, seier han.  

Terskelen for å gå ut er blitt lågare, både i forretningssamanheng og privat, og det gjeld òg ved lunsjtider. Bransjen er inne i ein positiv sirkel, og det forsterkar også dei positive ringverknadane.  

– Kokken har fått ein meir fortent plass i lommeboka til folk, seier Skrede.