Mest lønsame år nokon sinne

- Heilt fantastisk! Det er det beste året nokon sinne, seier eigar og dagleg leiar Olav Fjællingsdal i Sykkylven Bil om lønsemda i 2023.

Både bilsalet og aktiviteten i verkstaden kasta meir av seg i fjor.

Bruktbilhandlarane i Sykkylven finn hovudtyngda av kundane sine frå Førde i sør til Molde og Kristiansund i nord, men leverer til heile landet.

Bruktbilhandlen og verkstaden blir drive gjennom selskapet Sykkylven Bil medan bensin- og bilvaskstasjon blir drive gjennom selskapet Sykkylven Rekvisita.

Tøffare konkurranse
Tidlegare var det typisk slik at nybilforhandlarar sjølve selde dei nyaste bruktbilane dei tok inn, medan dei litt eldre blei seld til Fjællingsdal og andre bruktbilforhandlarar. No har marknaden endra seg, og nybilfohandlarane har byrja å selje også litt eldre bruktbilar sjølve.

Det skjerpar konkurransen om å ha bilar til kundane.

Så langt ligg 2024 an til å bli eit nytt godt år, men vilkåret for at det skal bli fasiten til slutt er at han klarer å få tak i nok bilar, seier Fjællingsdal.

Stopp for elbil
Det er diesel- og bensinbilar kundane spør etter.

Etterspørselen etter brukte elbilar er svært mager.

- No har vi meir eller mindre kutta det heilt ut, for det sel ikkje, seier han.