Millionsmell –som planlagt for simulatorselskap

Om ein ser isolert på resultata til simulatorselskapa til OSC i Ålesund i fjor, kan ein tru at dei slit i kraftig motgang. 

Slik er det ikkje, forsikrar simulatorsjef Joel Mills.

– Resultata er som planlagt. Vi investerer no i utvikling av ein programvareteneste for byar og havområde saman med investorane våre, fortel Mills til Nett No. 

– Utviklingsarbeid tek tid og kostar pengar
Rekneskapane viser at inntektene fall og underskota auka kraftig for alle dei tre selskapa; OSC As, Augmentcity og OSC Simulatorutleie Ålesund. 

I fjor enda dei samla inntektene til OSC-selskapa kring 54 millionar kroner – ein nedgang frå kring 80 millionar året før (sjå tabellar under). Det kjem av same årsak: Dei prioriterte utviklingsarbeid. 

– Utviklingsarbeid tek tid og kostar pengar. Det gjorde også at vi hadde mindre ressursar til å ta på oss andre prosjekt, og derfor blei inntektene redusert i fjor, fortel Mills. 

(saka held fram under)

Prisløna styreleiar
Mills påpeiker at deira løysingane for digitale tvillingar og simuleringar er mellom dei mest avanserte i verda. 

– Merksemda vårt er ikkje på topplinja, eller kostnader – men framtidige gjentakande inntekter – som alle store internasjonale tech-selskap, legg han til. 

OSC har også fått på plass ein ny styreleiar, Ingelin Drøpping, etter Jan Emblemsvåg – som ville bruke meir av tida si til å jobbe med kjernekraftprosjekt. 

Drøpping blei tidlegare i år kåra til Årets styrekvinne, og har leiarerfaring frå selskap som Telenor og Kongsberg Gruppen. 

– Mogleg å ta dette til ein langt større marknad
I samband med 20-årsmarkeringa i fjor haust, fortalde Mills at dei hadde kapitalen dei trengte på plass for dei neste par åra. 

Simulatorsjefen seier det er solide investorar som gjer satsinga mogleg.  

– Dei ser korleis det er mogleg å ta dette til ein langt større marknad med gjentakande inntekter frå teknologien. Vi rekrutterer dei beste talenta, og er på ei spennande reise.

– Det vil ta litt tid, men vi har full tillit frå investorane - og til at oppsida vil vere verdt innsatsen, legg Mills til. 

Nett No har tidlegare fortald at OSC vurderer å etablere seg internasjonalt, og har fått hjelp frå Innovasjon Norge til å vurdere moglegheitene i USA.