Moods of Norway gjer comeback

Etter konkursen i 2017 sto Jan Egil Flo i spissen for å kjøpe konkursbuet, og med det varelageret. 

Sidan har verksemda vore drive vidare, men i liten skala. 

No skal innsatsen aukast, mellom anna finansiert med ei kapitalutviding på 10 millionar kroner i regi av Folkeinvest.

Folkeinvest organiserer kapitalutvidingar retta mot små investorar, der det er råd å bli med også med relativt små beløp. 

Nytt selskap skal hente pengar
Frå 1. januar 2026 skal verksemda drivast under Moods of Norway-namnet, fortel Jan Egil Flo til Finansavisen.

I dag er han eigar av Moods of Norway, gjennom sitt eige selskap Berre Pluss. No skal selskapet hente ny eigenkapital.

Heile verksemda skal leggast inn i eit nytt selskap, der Flo og partnarar går inn med 20 millionar kroner - før det i neste omgang skal hentast inn 10 millionar kroner. 

I butikkane neste år
Målet er å ha Moods of Norway-plagg ute hos butikkar i august neste år. 

– Vi skal gjere ei rebranding og reintroduksjon av Moods of Norway, seier Flo til avisa. 

Moods of Norway-varemerket fekk eit nytt liv med Flo bak roret, og i ein svært krympa versjon samanlikna med stordomstida til klesmerket. 

I dag er det snakk om ein fysisk butikk i Stryn, og nettbutikk. Omlag 70 prosent av inntektene kjem frå nettbutikken. 

I fjor vart sjølve drifta gjort i regi av det majoritetseigde datterselskapet Retail Drift, som hadde 17,8 millionar kroner i driftsinntekt og 0,4 millionar kroner i resultat før skatt.