Møre Trafo veks ut av lokala – igjen

Møre Trafo er i full gong med å utvide arealet ved anlegget i Sykkylven.

Denne gongen er det snakk om ei utviding på kring 1400 kvadratmeter for å gjere plass til ei ny produksjonslinje.

– Slik kan vi få heve kvaliteten og øke kapasiteten når vi skal tørke, oljefylle og trykkteste ferdige produkt, seier dagleg leiar Runar Tandstad.

Treng meir plass på sikt
Reint praktisk gjerast utvidinga med ei samanbygging og forlenging av eksisterande bygg.

Auka produksjon har også gjort at lageret for inngåande varer er blitt for lite. Difor blir det også utvida med eit mindre bygg.

Tandstad fortel at det nærmar seg at dei har utnytta kapasiteten ved anlegget fullt ut. Difor blir det parallelt jobba med ein ny reguleringsplan for heile området.

– Det er ein plan som vil gjelde både for oss og nabobedriftene, legg Tandstad til.

Automatisert pulverlakkeringsanlegg
Møre Trafo hadde et historisk godt år i fjor med kraftig økning i omsetning og nær femdobling av overskuddet. Dermed hadde bedrifta lagt bak seg seks år på rad med vekst.

Tandstad ventar at pilane skal halde fram med å peike opp.

I løpet av dei siste åra er det mellom anna investert i nytt pulverlakkeringsanlegg som blei teke i bruk tidlegare i år.

Det meste av produksjonsprosessen i dette anlegget er automatisert, og to robotar står for sjølve lakkeringa.

– No kan vi kutte stål som smør
Ein ny maskin som kan kutte stålplater ved hjelp av laser kom på plass i fjor.

– No kan vi kutte stål som smør. Vi kan også mate inn platene og få maskina til å berekne korleis vi skal utnytte den best mogleg, seier Tandstad.

Han meiner investeringane i maskiner og utstyr skal gjere Møre Trafo i stand til å klare seg som norsk produsent i det som er ein krevjande - men også veksande marknad.

Treng anna type kompetanse enn før
Ein større og meir avansert maskinpark gjer at bedrifta har behov for andre folk enn tidlegare.

– Å operere slike maskinar krev ein litt anna type kompetanse enn vi rekrutterte tidlegare, seier Tandstad.

I dag er det difor langt større behov for folk som kan programmere og vedlikehalde maskinar.

Til eksempel gjerast manuell sveising i mindre grad enn tidlegare. Det er eit arbeid som i stadig større grad vert teke over av robotar.

Framleis manuelt handverk
Vikling - som går ut på å sno ein elektrisk leidning rundt ei kjerne – er eit handverk som framleis består. Og som det knapt blir utdanna folk til lengre. Difor lærer dei gjerne opp eigne folk til jobben.

– Det skal vere rett tal på viklingar og må vere gjort på heilt rette måten, seier Tandstad.