Nordea Markets: - Oppkjøpsfonda blir sittande på gjerdet

Så lenge bankane sit med pant og den reelle kontrollen over verdiane i offshorereiarlaga vil investeringsfond halde seg unna. Det er analysen Lars Kirkeby, sjefanalytikar på kreditt i Nordea Markets nett no presenterer på Klyngekonferansen under Campus-uka 2016 i Ålesund i dag.
Kirkeby meiner investeringar i offshore-reiarlag førebels ikkje er attraktive nok for investeringsfonda.
- Dei går inn der dei også kan få kontroll over eigedom, seier Kirkeby.
I offshorereiarlaga betyr det skipa, og dei er dei nesten utelukkande bankane som har pant i.
- Unntaket er Aker, seier Kirkeby og viser til at Aker gjekk inn som medeigar i Solstad Offshore og deretter kjøpte seg negativ kontroll i eitt av obligasjonslåna til Rem Offshore og pressa fram ei samanslåing av dei to selskapa.

Bankane tek ikkje tap

No er det stor semje i bransjen om at refinansieringsordningar må lagast slik at reiarlaga kan overleve fram til 2019/2020.

Bankane sitt bidrag i refinansieringa er så langt å utsette avdrag og mellombels reduserer renta, men ikkje ta tap. I dei refinansieringsordningane som er forhandla fram er det obligasjonslångivarane som har måtte ta tap på utlåna sine.

Kva skjer i neste runde?

Men kva skjer om krisa i offshore-sektoren ikkje er i ferd med å gå over i 2019/2020? Då er gjelda og overkapasiteten framleis eit problem.
- Viss det blir nye runder blir det mykje styggare, seier Kirkeby.
Då vil gjelda i offshorereiarlaga framleis vere eit problem, og då trur Kirkeby at bankane kan gjere andre vurderingar enn i dag; ta tap, selje seg ut av lån, eller til og med ta over selskap sjølv om det ikkje er eit ønska utfall.
Det vil opne vegen for investeringsfond, meiner han.

Forsterka problema

Obligasjonseigarane si rolle har stått sentralt i refinasieringsforhandlingane i offshorereiarlaga, og toppa seg då Aker kjøptye seg opp i eitt av obligasjonslåna til Rem Offshore nekta å støtte refinansiering av selskapet om ikkje Rem Offshore slo seg saman med Solstad Offshore, der Aker er stor aksjonær.
Men obligasjonslåna har berre forsterka problema for offshorereiarlaga, ikkje skapt dei. Det er banklån som utgjer den store delen av utlåna, minner Kirkeby om.