Nordic Wildfish kjøper Olympic Prawn

Bak Nordic Wildfish Pål og Jan Harald Roaldsnes, medan fiskebåten Olympic Prawn er eigd av Stig Remøy-selskapet Olympic Seafood.

Olympic Prawn vart levert frå Cemre Shipyard i Tyrkia i desember 2020.

Partane er samde om å ikkje offentleggjere prisen Nordic Wildfish betalar for båt og kvotar.

Fire båtar
– For Nordic Wildfish er dette ei viktig investering i tråd med vår strategi om å styrkje både satsinga på kvitfisk og vår posisjon som eit av dei store fiskeriselskapa i Noreg. Det er sjeldan ein får slike mogelegheiter i norsk fiskerinæring, seier CEO Anders Bjørnerem i Nordic Wildfish i ei pressemelding.

Nordic Wildfish har finansierte kjøpet gjennom lån i Sparebank1 SMN. Eigarskiftet skjer andre halvdel av januar.

Med Olympic Prawn har Nordic Wildsfish fire båtar. Planen er å spesialisere seg på trålfiske, som betyr at fiskebåten Roaldsnes kan bli seld. Den blir i dag brukt som snurrevadbåt.

Har ein milliard
– Eg fekk eit tilbod som var så godt at vi ikkje kunne seie nei, seier Stig Remøy til Fiskeribladet.

Han seier han no har rundt ein milliard kroner i frie kontantar i investeringselskapet sitt.

- Det skal investerast i nye, spennande prosjekt, seier han til avisa. Mellom anna ligg det i korta at Olympic Seafood skal bestille ny båt, ifølgje Remøy.

Under Remøy sitt selskap SRR Invest ligg både majoritetseigarskapen i offshorreiarlaget Olympic Subsea og krillfiske- og -foredlingsselskapet Rimfrost Holding, i tillegg til fiskeriverksemda.

No varslar han vekst.

- 2022 blir eit år der det kjem til å vere behov for folk i heile konsernet, seier Remøy til NETT NO.