Noregs Bank: Bedriftene trur på stabil vekst neste år

NPK-NTB: Ei Noregs Bank-undersøking viser at bedrifter ventar betre vekst neste år, men den viktige rapporten gir ingen fasit om rentekutt neste veke.

Rapporten Regionalt nettverk frå Noregs Bank er ei omfattande og jamleg spørjeundersøking til norske bedrifter. Rapporten blir rekna som ein svært viktig indikator før renteavgjerdene.

Les rapporten her

– Bedriftene ventar at produksjonsveksten vil halda seg oppe gjennom andre halvår, og dei planlegg å auka talet på tilsette i løpet av hausten, skriv Noregs Bank.

Bedriftene ventar at årslønnsveksten i år blir på 4,5 prosent og 4,0 prosent neste år. Lønnsemda er betre enn i fjor, ifølgje rapporten. Ei av fire bedrifter har problem med å få tak i arbeidskraft, noko som er ein høgare del enn før.

Torsdag om ei veke kunngjer Noregs Bank om styringsrenta skal justerast. Dei kjem då også med nye prognosar for rentebanen framover. Styringsrenta er for tida på 4,25 prosent, etter at ho vart sett ned i juni.

Heilt på vippen om rentekutt
Marius Gonsholt Hov, sjeføkonom i Handelsbanken, seier til E24 at rapporten gir signal om ein noko høgare rentebane enn Noregs Bank nok har sett for seg. Samtidig er nok aktiviteten i økonomien noko høgare.

– Det er heilt på vippen om det blir rentekutt neste veke, seier han.

Noregs Bank signaliserte svært tydeleg i juni at det kan komma eit kutt i september, og moglegheiter for endå eitt i desember. Etter det har både lønnsveksten og BNP-veksten vore høgare enn det sentralbanken såg føre seg. Også tala for kjerneinflasjonen som kom onsdag, var høgare enn venta.

Sjeføkonom Kyrre M. Knudsen i Sparebank 1 Sør-Noreg er meir positiv til utsiktene for eit kutt.

– Alt i alt er tala i rapporten ganske greitt på line med Noregs Banks anslag. Isolert støttar dette greitt opp under eit rentekutt neste veke, seier sjeføkonom Kyrre M. Knudsen i Sparebank 1 Sør-Noreg til FriFagbevegelse.

– Samtidig fekk me høgare inflasjonstal enn venta i går, noko som trekkjer litt i motsett retning, understrekar Knudsen.

Nordea usamd
Nordeas sjeføkonom er derimot usamd med kollegaene sine i bransjen.

– Det er ikkje lett å finna argument for kvifor dei skal setja ned renta, seier sjeføkonom Kjetil Olsen i Nordea til Dagens Næringsliv.

– Ein må halda det opp mot signala dei har gitt, og dette er ikkje veldig annleis enn det dei har signalisert. Eg kjenner likevel at summen av informasjon og heilskapsinntrykk peikar i retning av at det ikkje er openbert behov for rentekutt. For å seia det forsiktig, seier Olsen.