Norva 24 vil vekse meir i Noreg

Tidlegare i haust sa Konkurransetilsynet nei til at Norva 24 skulle få kjøpe det norske selskapet Vitek Miljø og innlemme det i Norva 24-konsernet.

Norva 24 har spesialisert seg på vedlikehald av infrastruktur under bakken. Selskapet spring ut av blant andre det som var selskapet Septik 24 i Stryn. I allianse med eit svensk investeringsfond har Norva 24 kjøpt opp ei rekke selskap både i Noreg og utlandet.

Oppkjøpa har gitt vekst og veksten held fram også i tredje kvartal (sjå tabell).

"Tilsynet mener oppkjøpet vil føre til redusert konkurranse om tømme- og spyletjenester i tidligere Hordaland fylke, og dermed høyere priser eller lavere kvalitet for kunder i dette markedet", skreiv Konkurransetilsynet i ei pressemelding i september i år.

– Norva24 Vest og Vitek Miljø er hverandres næreste konkurrenter, og konkurransepresset mellom dem vil forsvinne dersom oppkjøpet blir gjennomført. Dette kunne ha ført til økte priser og dårligere kvalitet på tømme- og spyletjenester for både private, offentlige og bedriftskunder, seier prosjektleiar Ingvild Nordtveit ved avdeling for bygg, industri og energi i Konkurransetilsynet i pressemeldinga.

Har klaga
I kvartalsrapporten for 3. kvartal skriv konsernsjef Henrik Norrbom at Norva 24 ikkje ser på Konkurransetilsynet sitt vedtak som ein stopp for fleire oppkjøp i Noreg.

Norva 24 har klaga på Konkurransetilsynet og ventar å få svar på klagen i januar neste år.